ወንጌል ማቴዎስ 28

28:1-8 ክርስቶስ ድሕሪ ሞቱ ሳልሰይቲ መዓልቲ ተንስአ፤ እዚ ኸኣ ንሱ ብዙሕ ግዜ ዝዛረበሉ ዝነበረ እዋን እዩ። ኣብ ቀዳመይቲ መዓልቲ ናይ ቀዳመይቲ ሰሙን ኣምላኽ ብርሃን ካብ ጸልማት ኪበርህ ኣዘዘ። በዛ መዓልቲ እዚኣ እዩ እቲ ብርሃን ዓለም ዝኾነ ንሱ ኻብ ጸልማት መቓብር ዘብረሀ፤ እዛ መዓልቲ እዚኣ ኸኣ ካብ ሕጂ ንቕድሚት ኣብ ሓድሽ ኪዳን ብተደጋጋሚ ተጠቒሳ ትርከብ፣ ከምታ ክርስትያናት ንኽብርቲ ክርስቶስ ኣኽቢሮም ኣብ ፍሉይ ኣኼባታት ዝሕብሩዋ መዓልቲ ኾይና። ጐይታና የሱስ ብሓይሉ ነቲ እምኒ ምገበሮ ምተንከባለለ ነይሩ፣ ግናኸ ብመልኣኽ ኪግበር መረጸ። ትንሳኤ ክርስቶስ፣ ከምቲ ንፈተውቱ ሓጎስ ዝኾኖ፣ ንጸላእቱን ድማ ፍርሕን ሽበራን እዩ። እቲ መልኣኽ ንኣንስቲ ኻብ ፍርሕታተን ኣተባብዖን ኣብረህን። ሓጥኣን ኣብ ጽዮን ይፍርሁ። ንስኻትኩም ግና ኣይትፍርሑ፣ ምኽንያቱ ትንሳኤኡ ምጽንናዕኩም ክኸውን እዩ። ሕብረትና ምስኡ መንፈሳዊ ኪኸውን ኣለዎ፣ ብእምነት ብቓሉ ገይርና። ነዛ ዓለም እዚኣ ገዛና ኽንገብራን 'ኣብዚ ምጽናሕ ጽቡቕ እዩ' ኽንብል ቅሩባት ክንከውን ከሎና፣ ሽዑ ጐይታና የሱስ ኣብዚ ከምዘየሎ፣ ከምዝተንስአ ንዘክር፤ ስለዚ ልብና ይንሳእን ንላዕለዋይ ነገር ይድለ። ከም ዝበሎ ተንሲኡ እዩ። ቃል ክርስቶስ ኽንጽበዮ ዝነገረና ነገር፣ ይኹን መከራ ናይዚ ህሉፍ እዋን፣ ይኹን እቲ ኺግለጽ ዘለዎ ክብሪ፣ ዘገርም ምዃኑ ኣይነሓስብ። እቲ ጐይታ ዝደቀሰሉ ቦታ ብእምነት ምርኣይ፣ ኣብና ጽቡቕ ጽልዋ ኺገብር ይኽእል እዩ። ብቕልጡፍ ኪዱ። ኣብኡ ምጽናሕ ጽቡቕ ነይሩ፣ ግናኸ ኣገልገልቲ ኣምላኽ ካልእ እተመደበሎም ዕዮ ኣለዎም። ቅድሚ እቲ ምስ ኣምላኽ ብሕቡእ ዝግበር ሕብረት ባህታ፣ ህዝባዊ ግልጋሎት ኪምረጽ ኣለዎ። ደቀ መዛሙርቲ ብዘለዎም ሓዘን ምእንቲ ኺጸናናዑ ንገሩዎም። ክርስቶስ ደቀ መዛሙርቱ ኣበይ ከም ዝነብሩ ይፈልጥ እዩ፣ ከምኡ’ውን ኪበጽሖም እዩ። እንኳን ንብዝሒ መንገዲ ጸጋ ርሑቓት ንዝኾኑ፣ ብጸጋኡ ርእሱ ኺገሊጽሎም እዩ። ፍርሕን ሓጎስን ብሓደ ኣሰጉሙወን። ደቀ መዛሙርቲ ክርስቶስ፣ ብዛዕባ እቲ ምስ ጐይታኦም ዘሕለፍዎ ሕብረት ተመኩሮኦም ንሓድሕዶም ኬፍልጡ፣ ከምኡ’ውን ኣምላኽ ንነፍሶም እንታይ ከም ዝገበረሎም ንኻልኦት ኪነግሩ ቅሩባት ኪኾኑ ኣለዎም።

ማቴ. 28:9-10

ናይ ኣምላኽ ጸጋዊ ምብጻሕ መብዛሕትኡ ግዜ ኣብ መገዲ ግቡእ የጋጥመና፤ እቶም ዘለዎም ንጥቕሚ ካልኦት ዝጥቀሙ ድማ፣ ዝያዳ ክወሃቦም እዩ። እዚ ምስ ክርስቶስ ዝነበረ ምርኻብ ዘይተጸበይዎ ነበረ፤ ክርስቶስ ግና ቀረባኦም ነበረ፣ ብቓል ድማ ሕጂ እውን ቀረባና እዩ። እቲ ሰላምታ፣ ካብቲ ናይ ክብሪ መንበሩ ዝሓዘሉ ግዜ ጀሚሩ እውን እንተኾነ፣ ክርስቶስ ንሰብ ዘለዎ ሰናይ ድላይ ይገልጽ። ህዝቡ ፍስሓ ዝመልኦ ህዝቢ ክኸውን ድላይ ክርስቶስ እዩ፣ ትንሳኤኡ ድማ ንሓጎስ ብዙሕ ምኽንያት የቕርብ። ኣይትፍርሑ። ክርስቶስ ካብ ምዉታት ተንስኤ፣ ፍርሂ ህዝቡ ንምጥፋእ፣ ኣብኡ ድማ ንፍርሂ ዝኸውን እኹል ኣሎ።