1Yaa Liibaanon, ibiddi mukkeetii birbirsaa kee akka fixuuf balbala kee bani!
2Mukti birbirsaa waan jigeef, yaa muka hoomii wawwaadhu! Mukkeetii warri jajjaboon badaniiru, yaa qilxuu Baashaan, caakkaan inni gobbuun waan cirameef, atis wawwaadhu!
3Iddoon isaan horii dheechisan waan isaan duraa badeef, tiksoonni in boo'u, mee dhaggeeffadhu! Ilmooleen leencotaas caakkaan Yordaanos inni gobbuun isaan duraa waan cirameef in aadu, mee dhaggeeffadhu!
4Waaqayyo gooftaan koo,“Hoolota warra qalmaaf kaa'aman soori!
5Warri isaan bitatan yommuu isaan qalatan hin adabaman; warri isaan gurguratan,“Waaqayyoon galanni haa ga'u! Nuyi sooromneerra” in jedhu; tiksoonni isaaniis isaaniif hin oo'an;
6ani deebi'ee warra biyya kana keessa jiraataniif hin oo'u; kunoo ani tokkon tokkon isaanii harka walii walii isaanii fi harka mootii isaaniitti dabarsee nan kenna; isaan biyyicha in rukutu, ani harka isaanii keessaa isaan hin baasu” jedha; kana Waaqayyotu dubbate.
7Ani hoolota warra qalmaaf kaa'aman, addumaan immoo warra miidhaman sana nan soore; ulee lamas fudhadhee, isa tokko,“Faara-tolina” isa kaan immoo,“Tokkummaa” jedhee nan moggaase, hoolotas nan tikse.
8Ji'a tokko gidduuttis tiksoota sadii nan baase; ani isaan nan jibbe, isaanis na jibban;
9kanaafan ani immoo,“Ani isin hin tiksu! Inni du'u haa du'u! Inni badus haa badu! Warri hafanis foon walii walii isaanii haa nyaatan!” jedhe.
10Kana booddee ulee koo isa “Faara-tolina” jedhamu sana fuudhee nan cabse, kakuu koo isa ani saba hundumaa wajjin gales nan cabse.
11Inni gaafasuma in cabe; hoolonni warri miidhamoon ana argan kun dubbii Waaqayyoo ta'uu isaa in beekan.
12Ani isaaniin,“Yoo isin duratti qajeelaa ta'ee mul'ateef, miindaa koo anaaf kennaa! Garuu yoo qajeelaa isinitti fakkaachuu dhabaate immoo haa hafu!” nan jedhe; achumaanis isaan miindaa koo meetii guroo soddoma anaaf in kennan.
13Waaqayyo yommus,“Meeticha suphe-dhooftuutti darbadhu!” naan jedhe; miindaa isaan kun “Ulfina-qabeessa” jedhanii, anaaf muran meetii guroo soddomman sana fuudhee mana qulqullummaa keessatti suphe-dhooftuutti nan darbadhe.
14Kana booddee ulee koo isa lammaffaa isa “Tokkummaa” jedhamu sanas nan cabse; kanaanis obbolummaan Yihudaa fi Israa'el gargar in cabe.
15Ergasiis Waaqayyo,“Mi'a tiksoota gowwootaa sana fudhadhu!
16Kunoo ani tiksee isa warra badee fi warra ilmoolee hin barbaanne, isa warra cabe hin wal'aane, isa warra fayyaa hin tiksine, biyyicha irratti nan kaasa; inni warra cooman in nyaata, kottee isaaniis irraa in buqqisa.
17Tiksoota warra waa'ee hin baafne, warra hoolota hin eegneef wayyoo! Billaan, harka isaa mirgaa isa irraa haa kutu, ija isaa mirgaas keessaa haa baasu! Harki isaa raawwatee haa gogu! Iji isaa mirgaas raawwatee haa jaamu!” jedhe.