1Yaa gooftaa, ati Waaqayyo koo ti, ani sin galateeffadha, maqaa kees nan jajadha; wanta dur akeeki isaa qopheeffame, isa dinqisiisaa fi amanamaa sana, amma raawwatteetta;
2ati mandarattii akka tuullaa kosii in goote, ishee masaraa qabdus in onsite, iddoo baqaa isa kan ormaas in diigde, inni immoo bara baraan deebi'ee mandara ta'ee hin ijaaramu;
3kanaafis sabni jajjaboonni ulfina siif in kennu, mandaroonni warra jal'ootaas si sodaatu.
4Ati isa deegaadhaaf iddoo baqaa in taate, isa dhabaas yeroo gidiraa isaatti in gargaarte; bokkaa yandoo iddoo itti dheessanii fi ho'a aduu jalaa iddoo itti baqatan gaaddisa in tolchiteef; wanti afaan jal'ootaa keessaa ba'u, akka bokkaa yandoo gannaa, akka ho'a aduu bonaa fi, akka bulluqa lafa gogaa ti.
5Akka duumessi ho'a qabbaneessu, akkasuma ati waca warra jal'ootaa gab in goota, weedduun isaaniis hin dhaga'amu.
6Waaqayyo gooftaan maccaa tulluu kana irratti, saba hundumaaf cidha nyaataa fi dhugaatii, cidha nyaata coomaa fi daadhii waynii isa gaarii in qopheessaaf;
7inni tulluu kana irratti gadda nama hundumaa irraa in balleessa, isa saba hundumaa irra buufates irraa in fuudha;
8raawwatees du'a in balleessa, Waaqayyo gooftaan imimmaan ija nama hundumaattii in haqa; guutummaa biyya lafaa irratti arrabsamuu saba isaa irra ture irraa in fageessa; Waaqayyo kana dubbateera.
9Yommus isaan, “Ilaa inni Waaqayyo keenya! Inni nuyi,“Nu fayyisa” jennee eeggachaa turre isa; inni nuyi amanannes isa; kottaa fayyisuu isaatti in gammanna, in ililchinas” in jedhu.
10Harki Waaqayyoo tulluu Xiyoon in golga, Mo'aab garuu, akkuma habaqiin iddoo kosii itti gatanitti dhidhiitamu, miilla isaa jalatti in dhidhiitama;
11Mo'aab akka nama daakaa daakuu harka isaa in bal'isa, garuu utuma inni colluma qabaate iyyuu Waaqayyo immoo akkuma inni gad liqimfamu in godha.
12Inni dalloota mandara kee warra dhedheeroo fi cicimmoo duuffisee, gad isaan in cicciibsa, caccabsees lafatti isaan in dabala.