1Waaqayyo, kunoo! Biyya lafaa onaa fi duwwaa in godha; Inni irra lafaa in geddara, warra isa irra jiraatanis in tamsaasa.
2Immata irratti kan ta'u, luboota irrattis in ta'a; isa namaaf hojjetu irratti kan ta'u, isa hojjechiifatu irrattis in ta'a; ishee namaaf hojjettu irratti kan ta'u, ishee hojjechiifattu irrattis in ta'a; isa bitu irratti kan ta'u, isa gurguru irrattis in ta'a; isa ergifatu irratti kan ta'u, isa ergisu irrattis in ta'a; isa liqeeffatu irratti kan ta'u, isa liqeessu irrattis in ta'a.
3Waaqayyo dubbii kana waan dubbateef, lafti guutummaatti duwwaa in ta'a, raawwatees saamamee in ona.
4Lafti gaddaan in coollaga, biyyi lafaa gogee in bada, gurguddoonni saba lafaa in mudhuku.
5Warri lafa irra jiraatan abboommii fi seerrata Waaqayyoo irra daddarbanii, kakuu bara baraas cabsuu isaaniitiin lafa in xureessan.
6Kanaaf abaarsi lafa in balleessa, namoonni isa irra jiraatan yakka oofii isaanii in baatu; kana irraa kan ka'es namoonni lafa irra jiraatan in gubatu, isaan keessaa immoo muraasi in hafa.
7Dameen muka waynii in coollaga, mukti wayniis ija in dhaba; warri dur garaan isaanii gammadu amma in gaddu;
8sagaleen dibbee inni nama gammachiisu, waci warra quufanii iyyaniis gab in jedha; sagaleen kiraaraas in hafa;
9namni akka durii daadhii waynii dhugee geeraru hin jiru, dhugaatii cimaan warra dhugutti in hadhaa'a;
10mandarattiin ontee in diigamti, homtinuu akka ol itti hin galleefis manneetiin warri hafan hundinuu in cufamu.
11Karaa irra dhaabatanii daadhii wayniitiif in iyyu; gammachuun hundinuu gadda in ta'e, ililleenis biyya keessaa in bade;
12mandarattiin akkuma ontetti in hafti, karri ishees in caccabdi;
13yommus biyyi lafaa fi saboonni lafa irraa, muka ejersaa isa iji isaa irraa hurgufamuu fi muka waynii isa iji isaa irraa ciramee, coraan isaa irratti hafee in fakkaatu.
14Warri hafan immoo sagalee isaanii ol fudhatanii, gammachuudhaanis ulfina Waaqayyoo in faarfatu, gara lixa-biiftuuttiis guddina isaa in odeessu.
15Egaa warri gara ba'a-biiftuu galata isaaf galchaa, warri galaana qarqaraas maqaa Waaqayyo gooftaa isa kan Israa'el galateeffadhaa!
16Gara qarqara lafaatii faarfannaa, “Isa qajeelaadhaaf ulfina kennaa!” jedhu in dhageenya; ani garuu deebisee, “Ani nama gad deebi'aa dha, ani nama gad deebi'aa dha, anaaf wayyoo! Gantoonni hin amanaman, gantoonni hin amanaman” nan jedhe.
17Yaa warra lafa irra jiraattanii! Na'uun, kiyyoon diriirfamaan, boolla keessatti kufuunis isin in eeggata.
18Inni sagalee iyyaa sodaatee jalaa fiigu, boolla keessatti in kufa; isa boolla keessaa ol ba'u immoo kiyyoon in qaba; yommus ittifni duraa fuudhamee bishaan bantii waaqaa keessaa gad in dhiifama, hundeen lafaas in socho'a;
19lafti in dho'a, caccabees in hurraa'a, guddaas in socho'a;
20lafti akka nama machaa'ee gatantaruu in godhatti, akka godoo qilleensi raasuus in raafamti, irra-dadarbaan ishee isheetti in ulfaata, in kufti, deebitees hin kaatu.
21Yeroo sanatti Waaqayyo, humnoota bantii waaqaa keessa jiranii fi mootota warra lafa irra jiran in adaba;
22isaan akka namoota booji'amanii walitti qabamanii, boolla keessa in buufamu; mana hidhaatti in galfamu, bara baay'ee booddees isaanitti in faradama;
23Waaqayyo gooftaan maccaa tulluu Xiyoon irratti, Yerusaalem keessattis yommuu mo'u, jiini in dimimmifti, biiftuunis akka nama qaana'ee fuula fokkisutti ibsuu in dadhabdi; maanguddoonni isaaniis ulfina isaa in argu.