ዮአብ

ዮኣብ ወዲ ጸሩያ ኮይኑ፡ ናይ ንጉስ ዳዊት ወዲ ሓብቱ እሞ ሓላፊ ሰራዊቱ ነበረ። ንመጀመርያ ግዜ ዝረአ ሳኦል ናብ ዝሰፈረሉ ቦታ ንዳዊት ክሰዓቦ ከሎ ኣብ1ኛ ሳሙ 26:6እዩ። ዮኣብ ዳዊት ስልጣን ክሕዝ ከምኡ'ውን መንግስቲ ክምስርት ኣብ ምግባር ዓብዪ ግደ ተጻዊቱ (2ሳሙ.2-3፤ 8.16፤1ኛ ዜና 11:6,8)። ዮኣብ ከም ወተሃደራዊ ሓላፊ፡ ንሰራዊት ዳዊት ኣብ ልዕሊ ኣሞናውያን፡ ሶርያውያንን ካልኦት ጸላእትን ኣብ ዝተፈላለዩ ውግኣት መሪሑ እዩ (2ሳሙ.10፤ 12.26-27፤ 1ዜና.19)። ከምኡ'ውን ንዕልወት ኣቤሴሎም ንምዕጋት ሓጊዙ እዩ፤ ንዕልወት ሴባ ብምስዓር ድማ ቀንዲ ግደ ነበሮ (2ሳሙ.18፤ 20)። ይኹን እምበር፡ እቲ ዮኣብ ንዳዊት ዝነበሮ ተኣማንነት ገለ ግዜ ብናይ ባዕሉ ትምኒትን ጭካነን ይሽፈን ነበረ። ሓዉ ኣሳሄል ብምሟቱ ምኽንያት ንምብቀል፡ ንቀድሞ ሓላፊ ሳኦል ዝነበረ ኣብኔር ቀተለ (2ሳሙ.3)። ብተወሳኺ ድማ ንኣቤሴሎም ብምቕታል ንትእዛዝ ዳዊት ኣይተኣዘዘን (2ሳሙ.18)፤ ኣዶንያስ ድማ ንዙፋን ንምምንዛዕ ዝገበሮ ፈተነ ደጊፉ እዩ (1ኛ ነገ 1:7,19)። ጉድለታቱ እኳ እንተነበሩዎ፡ ዮኣብ ክሳብ መወዳእታ ኣብ ግዝኣት ዳዊት ቀንዲ ሰብ ኮይኑ ጸኒሑ እዩ። ኣብ ልዕሊ እስራኤል ንፍርዲ ኣምላኽ ኣብ ዘምጽአ ቆጸራ ህዝቢ ተሳቲፉ እዩ (2ሳሙ.24፤ 1ዜና.21)፤ ኣብ መወዳእታ ድማ ንኣዶንያስ ብምድጋፉ ምኽንያት ብትእዛዝ ሰሎሞን ብበናያስ ተቐቲሉ (1ኛ ነገ 2:28-35)።