አቤል

ኣቤል ካልኣይ ወዲ ኣዳምን ሄዋንን ኮይኑ ድሕሪ ሓዉ ቃየል ተወሊዱ። ቃየል ገባር ክነሱ ንሱ ግና ጓሳ ነበረ። ክልቲኦም ኣሕዋት ንእግዚኣብሔር መስዋእቲ ኣቕረቡ፤ ግና እግዚኣብሔር መስዋእቲ ኣቤል ተቐበለ ናይ ቃየል ግና ኣይተቐበለን። እዚ ድማ ቃየል ክቐንእን ክቕየምን ገበሮ፤ ኣብ መወዳእታ ድማ ኣብ መሮር ንኣቤል ቀተሎ። እግዚኣብሔር ንቃየል ብዛዕባ ምቕታል ኣቤል ሓተቶ፤ በዚ ምኽንያት ድማ ቃየል ኣብ ምድሪ ተንከራታቲ ክኸውን ተረግመ። ሓድሽ ኪዳን ንኣቤል ከም ኣብነት እምነት (ዕብ 11:4) ደሙ ድማ ንፍትሒ ዝጮኸ ጻድቕ ሰብኣይ ገይሩ ይጥቅሶ (ማቴ 23:35;ሉቃ 11:51)። ደም ኣቤል ድማ ምስ ደም የሱስ ይነጻጸር፤ ደም የሱስ ግና ካብዚ ዝበለጸ ነገር ይዛረብ (ዕብ 12:24)። ኣቤል ምስ ሞተ ኣዳምን ሄዋንን ሴት ዝተባህለ ካልእ ወዲ ወለዱ።