መጽሓፍ ምሳሌ 13

1ለባም ውሉድ ተግሳፅ ኣቦኡ ይሰምዕ፤ መላገፂ ግና ተግሳፅ ኣይሰምዕን።

2ሰብ ካብ ፍረ ኣፉ ሰናይ ይምገብ፤ ነፍሲ ዓመፀኛታት ግና ግፍዒ ትምገብ።

3ኣፉ ዝገትእ፥ ህይወቱ ይሕሉ፤ ከንፈሩ ዝኸፍት ግና፥ ጥፍኣት ይረኽቦ።

4ነፍሲ ሃካይ ሰብ ትምነ፥ ግና ሓንቲኳ ኣይትረክብን፤ ነፍሲ ትጉሃት ግና የመና ትፀግብ።

5ፃድቕ ንዘረባ ሓሰት ይፀልኦ፤ ሓጥእ ግና የሕፍርን የነውርን።

6ፅድቂ ነቲ ብመንገዱ ቕኑዕ ዝኾነ ይሕልዎ፤ ሓጢኣት ግና ንሓጥእ የውድቖ።

7ንባዕሉ ሃብታም ኣምሲሉ ዝረአ ኣሎ፤ ግና ሓደኳ የብሉን፤ ንባዕሉ ድኻ ዘምስል ከዓ ኣሎ፤ ግና የመና ሃብቲ ኣለዎ።

8ሰብ ንህይወቱ ብገንዘቡ ይቢዜዋ፤ ድኻ ግና ዘስግኦ የብሉን።

9ንፃድቃን ኵልሻዕ ብርሃን እዩ፤ መብራህቲ ሓጥኣን ግና ይጠፍእ።

10ትዕቢት፥ ባእሲ ጥራሕ እዩ ዘምፅእ፤ ጥበብ ግና ምስቶም ምኽሪ ዝቕበሉ እያ።

11ብኸንቱ ዝተረኽበ ገንዘብ እናጐደለ ይኸይድ፤ ብፃዕሪ ዝተረኽበ ገንዘብ ግና እናበዝሐ ይኸይድ።

12ዝደንጐየ ተስፋ ንልቢ የሕዝኖ፤ ዝተፈፀመ ትምኒት ግና ኦም ህይወት እዩ።

13ንትእዛዝ ዝንዕቕ ብትእዛዛት ተትሒዙ ይጠፍእ፤ ትእዛዝ ዝፈርሕ ግና ብዳሓን ይነብር።

14ሰብ ካብ መፃወድያ ሞት ምእንቲ ኸምልጥ፥ ትምህርቲ ጠቢብ ፍልፍል ህይወት እያ።

15ሰናይ ፍልጠት ሞገስ ይህብ፤ መንገዲ ዓመፀኛታት ግና ሓርፋፍ እዩ።

16ብልሂ ሰብ ብምስትውዓል ይሰርሕ፤ ዓሻ ግና ዕሽነቱ ይገልፅ።

17ክፉእ ልኡኽ ኣብ ክፉእ ይወድቕ፤ እሙን ልኡኽ ግና ፈውሲ እዩ።

18ተግሳፅ ንዘይቕበል ሰብ፥ ድኽነትን ነውርን ይፀንሖ፤ ተግሳፅ ዝቕበል ግና ይኸብር።

19ዝተፈፀመ ትምኒት ንነፍሲ የሐጕሳ፤ ንዓያሹ ግና ኻብ ክፉእ ምርሓቕ ርኽሰቶም እዩ።

20ምስ ለባም ዝመላለስ ለባም ይኸውን፤ ምስ ዓያሹ ዝተዓራረኽ ግና መከራ ይቕበል።

21ንሓጥኣን ክፉእ ነገር የሳጕጎም፤ ፃድቃን ግና ሰናይ ዓስቢ ይቕበሉ።

22ፃድቕ ሰብ ንደቂ ደቁ የውርስ፤ ሃብቲ ሓጥእ ግና ንፃድቕ ይዕቈረሉ።

23ኣብ ግራት ድኻታት ብዙሕ ሲሳይ ይርከብ፤ ግና ኻብ ምጕዳል ፍርዲ ዝተልዓለ ይጠፍእ።

24ንውሉዱ ብጨንገር ከይቐፅዕ ዝርህርህ ሰብ ንውሉዱ ይፀልእ፤ እቲ ንውሉዱ ዘፍቅሮ ግና ተጠንቂቑ ይቐፅዖ።

25ፃድቕ ክሳዕ ዝፀግብ ይበልዕ፤ ከብዲ ሓጥኣን ግና ይጠሚ።