ኤፌሶን 6

6:1-4 ዓቢይ ግቡእ ውሉድ፡ ንወለዶም ምእዛዝ እዩ። እዚ ምእዛዝ እዚ፡ ውሽጣዊ ኣኽብሮት ከምኡ’ውን ግዳማዊ ተግባራት የጠቓልል፣ ኣብ ኩሉ ዘመን ድማ፡ እቶም ንወለዶም ብምእዛዝ ዝፍለጡ፡ ብብልጽግና ተሰንዮም እዮም። ግቡእ ወለዲ። ትዕግስቲ ኣይትስኣኑ፤ ዘይዕቁብ ጭከና ኣይትግበሩ። ምስ ውሉድኩም ብጥንቃቐን ብጥበብን ተመሓደሩ፤ ፍርዶም ኣዕጊብኩም፡ ኣብ ኣእምሮኦም ስርሑ። ብግቡእ፡ ብርሕሩሕ ገስጻ፡ ከምኡ’ውን ነቲ ኣምላኽ ዝደልዮ ግቡእ ብምፍላጥ ኣዕብይዎም። እዚ ግቡእ እዚ፡ ኣብቶም ወንጌል ዝሰብኩ ውን፡ ብዙሕ ግዜ ይነዓቕ። ብዙሓት ንውሉዶም ንሃይማኖት ይጻረሩ፤ እዚ ግና ንዘይምእዛዝ ውሉድ ኣየውጽኦምን እዩ፡ እኳ ድኣ ብዝገርም መገዲ ክኸውን ምኽንያት ክኸውን ይኽእል እዩ። ኣምላኽ በይኑ እዩ ንልቢ ክቕይር ዝኽእል፡ እንተኾነ ግና፡ ንጽቡቕ ትምህርትን ኣርኣያ ወለድን በረኸቱ ይህብ፡ ንጸሎቶም ድማ ይምልስ። እቶም ቀንዲ ጭንቀቶም ውሉዶም ሃብታማትን ብቑዓትን ምዃን ጥራይ ዝኾነ፡ ነፍሶም እንታይ ከም እትኸውን ዘየገድሶም ግና፡ በረኸት ኣምላኽ ክደልዩ ኣይግባእን።

6:5-9 ግዴታ ባሮት ብሓንቲ ቃል ተጠቃሊሉ ይርከብ፡ ንሳ ድማ ምእዛዝ እያ። ናይ ጥንቲ ባሮት ብሓፈሻ ባሮት እዮም ነይሮም። ሃዋርያት ነቶም ባሮትን ጐይተቶምን ግዴታኦም ኪምህሩ ነይሩዎም። ነዚ ብምግባሮም ድማ እከይ ይንኪ፣ ክሳዕ እቲ ባርነት ብጽልዋ ክርስትና ምሉእ ብምሉእ ዝጠፍእ። ባሮት ነቶም ልዕሊኦም ዘለዉ ኬኽብሩ ይግባእ። ቅንዑት ኪኾኑ ይግባእ፤ ክእዘዙ ከም ዘይደልዩ ኾይኖም እናተኣዘዙ ኣይኮኑን፣ የግዳስ ብእምነት ኬገልግሉ። ንጐይተቶም ከኣ ዓይኒ ጐይተኦም ኣብ ልዕሊኦም ጥራይ ከሎ ኣይኮኑን ኬገልግሉ ዘሎዎም፤ የግዳስ ንሱ ኣብ ዘይብሉን ካብ ዓይኒ ርሑቕ ኣብ ዝኾነሉ እዋንን እውን ብግዴታኦም ጽንዑታት ኪኾኑ ይግባእ። ንጐይታና የሱስ ክርስቶስ ዘሎና ጽኑዕ ኣኽብሮት ሰባት ኣብ ኩሉ ቦታ እሙናትን ቅንዑታትን ኬገብሮም እዩ፣ ብምጕርምራም ወይ ብግዲ ዘይኮነስ፡ የግዳስ ካብ መሰረት ፍቕሪ ናብ ጐይተቶምን ጉዳያቶምን ዝብገስ። እዚ ድማ ኣገልግሎት ንኣኦም ቀሊል፣ ንጐይተቶም ባህ ዜብል፣ ንጐይታ ክርስቶስ ከኣ ቅቡል ኬገብሮ እዩ። ኣምላኽ እኳ እቲ ዝሓሰረን ኣድካምን ዕዮ፡ ካብ ስምዒት ግዴታ ተገይሩ ንምኽባሩ ብዝብገስ ሓሳብ እንተተሰርሐ ኪፍድዮ እዩ።

ኣብዚ ድማ ግዴታ ጐይተታት ይርከብ። ብኸምኡ ኣገባብ ግበሩ። ንባሮትኩም ቅኑዓት ኩኑ፡ ንስኹም ካብኣቶም ከምኡ ኪኾኑልኩም ከም እትጽበዩ፤ ንኣኦም እውን ከምኡ ድሌትን ዘኻኽርን ኣርእዩ፡ ኣብዚ እውን ንኣምላኽ ቅቡላት ክትኾኑ ተጠንቀቑ። ጨካናትን ተቖጻጸርትን ኣይትኹኑ። ንስኻትኩም እትእዘዝዎ ጐይታ ኣሎኹም፣ ንስኻትኩምን ንሳቶምን ድማ ኣብ ክርስቶስ የሱስ ብምጥማት ብጾት ባሮት ጥራይ ኢኹም እሞ። ጐይተታትን ባሮትን ናብ ኣምላኽ ዘለዎም ግዴታ እንተዝሓስቡ፣ ከምኡ’ውን ነቲ ብቕሩብ ግዜ ንእኡ ኪህብዎ ዘሎዎም ጸብጻብ እንተዝዝክሩ፡ ንሓድሕዶም ዘለዎም ግዴታ ብዝያዳ ምዝክርዎ፣ በዚ ኸኣ ስድራታት ብዝያዳ ስርዓታውን ሕጉስን ምኾና።

6:10-18 ንመንፈሳዊ ውግእን መከራንና፡ መንፈሳዊ ሓይልን ትብዓትን የድልየና እዩ። እቶም ሓቀኛ ጸጋ ከም ዘሎዎም ርእሶም ኬርእዩ ዚደልዩ፡ ንኹሉ ጸጋ ኺተሃንጠዩ ኣሎዎም፤ ንሱ ዜዳሎን ዚህቦን ምሉእ ዕጥቂ ኣምላኽ ኪለብሱ ድማ ኣሎዎም።