1ፍቁራተይ፡ ብዙሓት ናይ ሓሶት ነብያት ናብ ዓለም ወጺኦም እዮም እሞ፡ ነቶም መናፍስቲ ካብ ኣምላኽ እንተ ዀይኖም ንምፍላጥ እምበር፡ ንመንፈስ ዘበለ ኣይትእመን።
2ብመንፈስ ኣምላኽ በዚ ትፈልጥዎ ኢኹም፦ የሱስ ክርስቶስ ብስጋ ከም ዝመጸ ዚናዘዝ መንፈስ ዘበለ ዅሉ ካብ ኣምላኽ እዩ።
3የሱስ ክርስቶስ ብስጋ ከም ዝመጸ ዘይናዘዝ መንፈስ ከኣ ካብ ኣምላኽ ኣይኰነን። እዚ ድማ እቲ ንሱ ከም ዝመጽእ ዝሰማዕኩምዎ መንፈስ ጸረ ክርስቶስ እዩ፤ ሕጂ እውን ኣብ ዓለም እኳ እንተሎ።
4ደቀይ፡ እቲ ኣባኻትኩም ዘሎ ካብቲ ኣብ ዓለም ዘሎ ይዓቢ እሞ፡ ንስኻትኩም ካብ ኣምላኽ ኢኹም እሞ፡ ስዒርኩምዎም።
5ካብ ዓለም እዮም፤ ስለዚ ብዛዕባ ዓለም ይዛረቡ፡ ዓለም ድማ ትሰምዖም።
6ንሕና ካብ ኣምላኽ ኢና፤ እቲ ንኣምላኽ ዝፈልጥ ይሰምዓና፤ እቲ ካብ ኣምላኽ ዘይኰነ ኣይሰምዓናን እዩ። በዚ ድማ መንፈስ ሓቅን መንፈስ ስሕተትን ንፈልጥ።
7ፍቁራተይ፡ ፍቕሪ ካብ ኣምላኽ እያ እሞ፡ ንሓድሕድና ንፋቐር። ዘፍቅር ዘበለ ድማ ካብ ኣምላኽ ተወሊዱ ንኣምላኽ ይፈልጦ እዩ።
8ዘየፍቅር ንኣምላኽ ኣይፈልጦን እዩ። ምኽንያቱ ኣምላኽ ፍቕሪ እዩ።
9ኣምላኽ ብእኡ ምእንቲ ኽንነብር፡ ነቲ ሓደ ወዱ ናብ ዓለም ስለ ዝለኣኾ፡ ፍቕሪ ኣምላኽ ኣባና በዚ እያ እትግለጽ።
10እታ ፍቕሪ እዚኣ እያ፡ ንሕና ንኣምላኽ ከም ዘፍቀርናዮ ዘይኰነስ፡ ንሱ ስለ ዘፍቀረና፡ ንወዱ ድማ መተዓረቒ ሓጢኣትና ኪኸውን ከም ዝለኣኾ እዩ።
11ኣቱም ፍቁራተይ፡ ኣምላኽ ከምኡ እንተ ኣፍቀረና፡ ንሕናውን ንሓድሕድና ንፋቐር።
12ንኣምላኽ ዝረኣዮ ሓደ እኳ የልቦን። ንሓድሕድና እንተተፋቒርና ኣምላኽ ኣባና ይነብር፡ ፍቕሩ ድማ ኣባና ፍጹም ኮይኑ ኣሎ።
13ንሱ ኻብ መንፈሱ ስለ ዝሃበና፡ ኣብኡ፡ ንሱ ድማ ኣባና ኸም እንጸንዕ በዚ ንፈልጥ ኢና።
14ኣቦ ንወዲ መድሓኒ ዓለም ኪኸውን ከም ዝለኣኾ ድማ ርኢና መስኪርና ኢና።
15የሱስ ወዲ ኣምላኽ ምዃኑ ዚናዘዝ ዘበለ ዅሉ፡ ኣምላኽ ኣብኡ ይነብር፡ ንሱውን ኣብ ኣምላኽ ይነብር።
16ነቲ ኣምላኽ ኣባና ዘለዎ ፍቕሪ ድማ ፈሊጥናዮን ኣሚንናዮን። ኣምላኽ ፍቕሪ እዩ፤ እቲ ብፍቕሪ ዚነብር ድማ ኣብ ኣምላኽ፡ ኣምላኽ ድማ ኣብኡ ይነብር።
17በዚ ኸኣ ፍቕርና ፍጽምቲ እያ፣ ምእንቲ ብመዓልቲ ፍርዲ ትብዓት ክህልወና፣ ከመይሲ ከምቲ ንሱ ዘለዎ ንሕናውን ኣብዛ ዓለም እዚኣ ኢና።
18ኣብ ፍቕሪ ፍርሒ የልቦን። ፍጽምቲ ፍቕሪ ግና ንፍርሃት ትድርብዮ፡ ፍርሒ ስቓይ ስለ ዘለዎ። እቲ ዝፈርሕ ብፍቕሪ ፍጹም ኣይኰነን።
19ቅድም ስለ ዘፍቀረና ኢና ነፍቅሮ።
20ሓደ ሰብ፡ ኣነ ንኣምላኽ የፍቅሮ፡ ንሓዉውን እንተ ጸሊእዎ፡ ሓሳዊ እዩ። ነቲ ዝረኣዮ ሓዉ ዘየፍቅሮሲ፡ ነቲ ዘይረኣዮ ኣምላኽ ከመይ ኢሉ የፍቅሮ፧
21እቲ ንኣምላኽ ዜፍቅር ንሓዉ እውን ኬፍቅሮ እዩ ዚብል ትእዛዝ እዚ ካባኡ ረኸብና።