1ffaa Mootota 2

GAZGAZAfaan Oromoo46 Keeyyattoota12:07 Dhaggeeffadhu

Dhaggeeffadhu 12:07 · Idilee · Diraamaawaa Biblight keessatti bani

1Daawit yeroon du'uu isaa yommuu dhi'aate ilma isaa Solomoonin waamee gorsa kanatti fufee jiru in kenneef.

2Gorsi isaas,“Yeroon du'uu kootii ga'eera; ati garuu jabaadhu, gara-kuteessa ta'i!

3Iddoo dhaqxu hundumaatti wanti ati gootu hundinuu akka wal siif qixxaatutti, waan Waaqayyo gooftaan kee si irraa barbaadu raawwadhu! Karaa isaa irra deddeebi'i! Akkuma seera Musee keessatti caafamee jirutti seerrata isaa, abboommii isaa, wanta isa duratti qajeelaa ta'ee fi dubbii isaaf dhugaa ba'u eegi!

4Waaqayyo,“Ilmaan kee garaa isaanii fi yaada isaanii guutuudhaan ana duratti amanamanii of eeggannaadhaan yoo jiraatan, sanyii kee keessaa mootii ta'ee teessoo Israa'el irra kan taa'u hin dhabamu” jedhee isa ana abdachiise in eega.

5“Yo'aab inni Zeruyaan deesse immoo, Abneer ilma Neerii fi Amaasaa ilma Yeter angafoota loltoota Israa'el akka inni ajjeese, anas immoo wanta inni godhe in yaadatta; inni sababii isaan yeroo lolaatti nama ajjeesaniif, yeroo nagaa keessa dhiiga dhangalaasuu isaatiin ijaa isaan ba'e, dhiiga isaanii sanas hidhata mudhii isaatiif kophee miilla isaatiitti akka dibe in yaadatta.

6Qabaa ogeessaatiin isa qabi malee, dulloomee hamma inni du'utti isa hin eegin!

7Yommuun obboleessa kee Abiishaalom duraa baqadhe, ilmaan Baarzilaayi Giil'aadichaa ana bira goraniiru; kanaafis ati isaaniif wanta gaarii godhi! Isaan warra kaanii wajjin maaddii kee irraa haa nyaatan!

8“Kunoo, Shime'iin ilmi Geraa Benyaamiinichaa inni yommuun Mahanaayimin dhaqe baay'isee na abaare sun ana simachuudhaaf yommuu inni laga Yordaanositti gad bu'e, ani immoo,“Ani billaadhaan si hin ajjeesu” jedhee maqaa Waaqayyootiin kakadheen ture; inni amma mandara Bahuriimii dhufee si bira jira.

9Inni nama balleessaa hin qabne sitti hin fakkaatin! Ati sababii nama ogeessa taateef, wanta isa gochuuf jirtu beekta; dullumma isaa kana keessa salphinaan akka inni du'u godhi!” kan jedhu ture.

10Daawit akkuma abboota isaatii du'ee, mandara isaa isa “Mandara Daawit” jedhamee beekame keessatti in awwaalame.

11Daawit waggaa torba Kebroon keessa, waggaa soddomii sadii immoo Yerusaalem keessa taa'ee, walumatti waggaa afurtama Israa'el irratti in mo'e.

12Kana booddee Solomoon teessoo abbaa isaa Daawit irra in taa'e, mootummaan isaas jabaatee in dhaabateef.

13Kana gidduutti Adoniyaan inni Haagiit deesse gara Baat-Sheebaa haadha Solomoon in dhaqe; Baat-Sheebaanis,“Naguma dhuftee?” jettee isa gaafatte; inni immoo,“Eyyee naguma” jedhee deebiseef.

14Itti fufees,“Ani waanan sitti himadhun qaba” jedhe; isheen immoo,“Jedhi kaa! Maal inni?” jetteen.

15Inni immoo kana irratti,“Akkuma ati beektu silaa anatu mootii ta'a ture; Israa'el guutummaatti,“Isatu mootii nuuf ta'a” jedhanii eeggachaa turan; amma garuu Waaqayyo biraa isaaf waan kennameef, dubbiin geddaramee obboleessi koo mootii in ta'e.

16Egaa ani amma wanta tokkon si kadhadhaatii hadaraa ana hin didin!” jedhe; isheenis,“Mee jedhi kaa!” jetteen.

17Inni immoo,“Solomoon mootichi si hin diduutii Abiishaag Shuneemittii akkan fuudhuuf hadaraa isatti anaaf himi!” jedhe.

18Baat-Sheebaan,“Ba'eessa! Mootichatti siifan hima” jetteen.

19Yommus Baat-Sheebaan isa Adoniyaan gaafate himuufiif gara mootichaa in dhaqxe; mootichis ka'ee ijaajjee qoomma'ee ishee simate; deebi'ee teessoo isaa irra in taa'e; haati mootichaa sunis teessoo fidanii kaa'aniif irra gara mirgaa mootichaatiin in teesse.

20Isheen mootichaan,“Ani wanta xinnoo tokkon si kadhadhaatii hadaraa ana hin didin!” jette; mootichi immoo,“Yaa harmee ko si hin diduutii anatti himadhu!” jedhe.

21Isheenis,“Abiishaag Shuneemittiin Adoniyaa obboleessa keetti haa heerumtuu?” jette.

22Solomoon mootichi deebisee haadha isaatiin,“Erga inni obboleessa koo isa angafa ta'ee, mootummichas immoo isaaf, Abiyaataar lubichaa fi Yo'aab isa Zeruyaan deesseefis gaafadhu malee, maaliif Abiishaag Shuneemittii duwwaa gaafattaaf ree?” jedhe.

23Yommus Solomoon maqaa Waaqayyootiin kakatee,“Adoniyaan gaaffii akkasii gaafachuu isaatiif, lubbuu isaa hin galaafachiisu yoon ta'e, Waaqayyo ana haa balleessu!

24Dhugaa Waaqayyo isa jiraataa, isa akkuma dubbatetti jabeessee ana dhaabee, toora mootummaa anaaf kennee, teessoo abbaa koo Daawit irra akkan taa'u godhee ti, har'a Adoniyaan in ajjeefama” jedhe.

25Achumaanis Solomoon mootichi Benaayaa ilma Yehoyaadaa itti in ajaje; Benaayaanis dhaqee Adoniyaa rukutee in ajjeese.

26Solomoon mootichi, Abiyaataar lubbichaan,“Ati illee nama ajjeefamuuf maltee dha, garuu sanduuqa kakuu Waaqayyo gooftaa baattee fuula abbaa koo Daawit dura adeemaa, rakkina isa irra ga'e hundumaas isaa wajjin hirmaachaa waan turteef, si hin ajjeesuutii gara araddaa kee isa Anaatot keessaa dhaqi!” jedhe.

27Solomoon akkasitti Abiyaataarin hojii lubummaa isa inni Waaqayyoof hojjetu keessaa in baase; kanaanis dubbiin Waaqayyo sanyii Elii irratti Shiilootti dubbate in raawwatame.

28Yo'aab yaada Abiishaalom duukaa bu'uu yoo dhiise iyyuu, yaada Adoniyaa duukaa bu'ee waan tureef, oduu kana yommuu dhaga'e, sodaatee gara godoo qulqullaa'aatti baqatee, gaanfa iddoo aarsaa sana in qabate.

29Kunoo, Yo'aab gara godoo qulqullaa'aatti baqatee iddoo aarsaa bukkee akka jiru Solomoon mootichatti in himan; Solomoon mootichi, Benaayaa ilma Yehoyaadaa isatti ergee,“Dhaqii rukutii isa ajjeesi!” jedheen.

30Benaayaan gara godoo qulqullaa'aa dhaqee Yo'aabiin,“Mootichi,“Gad ba'i!” siin jedha” jedhe; inni garuu deebisee,“Lakkii, ani asumattan du'a malee gad hin ba'u” jedhe; Benaayaan immoo gara mootichaatti deebi'ee wanta Yo'aab jedhe isatti in hime.

31Mootichis Benaayaadhaan,“Akkuma inni jedhe iyyuu rukutii isa ajjeesi, awwaalis! Akkasitti yakka isa inni dhiiga nama balleessaa hin qabne dhangalaasuudhaan nutti fide, ana irraa, mana abbaa kootii irraas in qulleessita.

32Sababii inni Abneer ilma Neer ajajaa humna waraana Israa'elii fi Amaasaa ilma Yeter ajajaa humna waraana Yihudaa warra isa caalaa qajeelota ta'anii fi isa irra wayyan utuu abbaan koo Daawit hin beekin billaadhaan ajjeeseef, dhiiga isaanii Waaqayyo matuma isaatti in deebisa.

33Eyyee, dhiiga namoota sanaa dhangalaasuu isaatiin yakki inni yakke bara baraan mataa isaa fi mataa sanyii isaa irraa haa barbaadamu! Daawitii fi maatii isaaf, sanyii isaa fi mootummaa isaatiifis garuu bara baraan Waaqayyo biraa nagaan haa ta'uuf!” jedhe.

34Yommus Benaayaan ilmi Yehoyaadaa dhaqee rukutee Yo'aabin in ajjeese; lafa onaa keessatti araddaa ofii isaatiitti in awwaalame.

35Mootichi kana booddee Benaayaa ilma Yehoyaadaa iddoo Yo'aab ajajaa humna waraanaa godhe; Zaadoq lubicha immoo iddoo Abiyaataar angafa lubootaa godhee hojii irra in dhaabe.

36Mootichi yommus Shime'ii waamsisee,“Ati Yerusaalemitti mana ijaarradhuutii keessa taa'i malee, iddoo biraa hin dhaqin!

37Mandara Yerusaalem keessaa baatee laga Qedroon yoo ceete, akka duutu beekkadhu! Dhiigni kees akkuma dhangala'etti in hafa” jedhee isatti in dubbate.

38Shime'iin deebisee mootichaan,“Wanti ati dubbatte kun ba'eessa; ani garbichi kee akkuma ati mootichi gooftaan koo dubbatte nan godha” jedhee, mandara Yerusaalem keessa yeroo dheeraa in jiraate.

39Waggaa sadii booddee garuu, hojjetoonni isaa lama isa duraa badanii, Akiish ilma Ma'akaa mootii Gaatitti in baqatan; hojjetoonni isaa Gaatin akka jiran Shime'iin yommuu dhaga'e,

40ka'ee harree isaa fe'atee isaan barbaaduudhaaf Akiish mootii Gaat bira in dhaqe; inni hojjetoota isaa Gaatitti argatee deebisee gara mana isaatti fudhatee in gale.

41Shime'iin mandara Yerusaalem keessaa ba'ee biyya Gaat dhaqee akka deebi'e, Solomoon mootichi yommuu dhaga'e,

42isa waamsisee,“Iddoo biraa dhaquuf jettee as keessaa yoo baate akka duutu beeki!” jedhee, maqaa Waaqayyootiin si kaksiisee, si akeekkachiises hin turree ree” Atis immoo,“Wanti ati dubbatte kun ba'eessa, ani akka ati jette nan godha” anaan hin jennee ree”

43Mootichi itti fufee,“Egaa isa maqaa Waaqayyootiin kakatte maaliif cabsite ree” Abboommii koos maaliif hin eegin ree”

44Wanta hamaa abbaa koo Daawit irratti hojjette hundumaa gaarii gootee beekta; isa kanaaf Waaqayyo si adaba.

45Ana Solomoonin garuu Waaqayyo in eebbisa; mootummaa Daawitis bara baraan jabeessee in dhaaba” jedhe.

46Mootichi yommus Benaayaa ilma Yehoyaadaa in abboome; inni achumaan dhaqee Shime'ii rukutee in ajjeese; Solomoonis guutummaatti mootummicha harka isaa jala in galfate.

Ibsa

Boqonnaa 2

Boqonnaa kana keessatti Daawit yeroo dhihaatu, Solomoon immoo yeroo ol ka'u argina.

I. Mootummaan Daawit jireenya isaa wajjin xumuramuun.

1. Ajaja inni Solomooniif yeroo du'aaf dhihaatu kenne, waliigalaan Waaqayyoon tajaajiluuf (Lakk. 1-4), addatti immoo Yo'aab, Barzilaayii fi Shim'ii ilaalchisee (Lakk. 5-9).

2. Du'a isaa fi awwaala isaa, akkasumas waggoota mootummaa isaa (Lakk. 10, 11).

II. Mootummaan Solomoon jalqabuu isaa (Lakk. 12). Inni mootii nagaa ta'uuf kan ture ta'us, mootummaa isaa hojiiwwan qajeelummaa dinqisiisoo ta'aniin jalqabe:

1. Adoniyaa irratti, inni fedhii ol ka'aa qabaachuuf isa ajjeese (Lakk. 13–25).

2. Abiyaataar irratti, inni Adoniyaa wajjin hiriiruusaatiif angafa lubummaa irraa isa buuse (Lakk. 26, 27).

3. Yo'aab irratti, inni gantummaa isaa isa dhihoo fi ajjeechaa isaa isa duraaniif isa ajjeese (Lakk. 28–35).

4. Shim'ii irratti, inni Daawitiin abaaruusaatiif Yerusaalemitti isa hidhe (Lakk. 36–38), waggaa sadii booda immoo, seera cabsuusaatiif isa ajjeese (Lakk. 39–46).

Lakk. 1-11

Daawit, nama guddaa fi gaarii sana, asitti nama du'aaf dhihaatu (Lakk. 1), akkasumas nama du'e dha (Lakk. 10). Jireenyi biraa kana booda jiraachuun gaarii dha; duuti ulfina kana hundumaa waan xureessuuf, akkasumas biyyee keessa waan buusuuf.

Asitti kan qabnu:

I. Ajaja fi qajeelfama Daawit, yeroo du'aaf dhihaatu, Solomoon ilma isaa fi dhaaltuu isaa ifatti labsameef kenne. Inni ofii isaa dadhabaa deemuun itti dhaga'ama, kana fudhachuufis duubatti hin deebi'u, du'a dhaga'uu yookiin dubbachuufis hin sodaatu: "Ani karaa lafa hundumaa nan deema" (Lakk. 2). Ibrootaan: "Ani keessa deemaa jira." Hubadhaa, duuti karaa dha; jireenya kanaaf xumura qofa osoo hin taane, gara jireenya gaariitti darbuu dha. Inni karaa lafa hundumaa ti, karaa namoota lafa irra jiraatan hundumaa ti, isaan ofii isaanii biyyee waan ta'aniif, gara biyyee isaaniitti deebi'uu qabu. Ilmaan fi dhaaltota samii illee karaa lafa hundumaa deemuu qabu, du'uun isaan barbaachisa; garuu karaa kana keessa, sulula gaaddidduu du'aa keessa, gammachuudhaan deemu (Faarfannaa 23:4). Raajonni, akkasumas mootonni illee, gara ifa fi ulfina raajummaa yookiin mootummaa caaluutti karaa kana deemuu qabu. Daawit karaa kana deemaa jira, kanaaf Solomooniif maal akka godhu qajeelfama kenna.

1. Waliigalaan, ajaja Waaqayyoo akka eeguu fi hojii isaa akka beeku isa ajaje (Lakk. 2-4). Inni isaaf kan ajaje: (1.) Seera gaarii ittiin hojjetamu—fedha Waaqayyoo: "Ofii kee sanaan bulchi." Ajajni Daawit isaaf kenne, ajaja Waaqayyoo Gooftaa isaa akka eegu dha. Aangoon abbaa du'aa guddaa dha, garuu kan Waaqayyo jiraataa wajjin yoo wal bira qabame homaa miti. Amanamummaa guddaa Gooftaan keenya Waaqayyo nuuf kenne jira—akka warra herrega kennuu qabnuutti, isaan haa eegnu; akkasumas seerota gaggaarii ittiin bulfamuu qabnu jira—isaanis haa eegnu. Dubbiin barreeffame seera keenya dha. Solomoon ofii isaa akka seera Musee keessatti barreeffame hojjechuu qaba. (2.) Haala gaarii ittiin hojjetamu: "Jabaadhuu nama ta'uu kee argisiisi," umuriidhaan mucaa ta'us. Warri ajaja Waaqayyoo Gooftaa isaanii eeguu barbaadan murannoo uffachuu qabu. (3.) Sababoota gaarii kana hundumaaf. Kun bu'aa qabeessummaan kan gargaaru: [1.] Mootummaa isaa milkeessuuf. Kun wanta hojjettu hundumaa keessatti milkaa'uuf, akkasumas hojii hundumaa keessatti ulfinaa fi gammachuudhaan galma ga'uuf karaa dha. [2.] Dhaabii isaa tiif: "Gooftaan dubbii inni waa'ee koo dubbate akka itti fufu fi mirkaneessuuf." Warri qabeenya abdii, amanamaa qulqulluu sana, sirriitti dinqisiifatan, dhaaltummaa isaa eeguuf dhiphachuu dhiisuu hin danda'an, akkasumas warri isaan booda dhufan isa hin murre akka ta'an baay'ee hawwu. Tokkoon tokkoon namaa, umrii isaa keessatti, walitti aansuudhaan, ajaja Waaqayyoo haa eegu, sana booda Waaqayyo dubbii isaa itti fufuun isaa mirkanaa'aa ta'a. Ajaja yoo dhiisne malee, abdiis hin dhiisnu. Waaqayyo Daawitiif Masiihiin sanyii isaa irraa akka dhuftu waadaa galee ture, akkasumas waadaan sun guutuu ture: garuu waadaan nama teessoo Israa'el irraa hin dhabamne akka hin dhabamne kan ture haalaan ture—yoo sanyiin isaa akka isaan qabanitti of bulchan. Solomoon, yeroo isaa keessatti, haala sana yoo guute, abdiin sun akka itti fufuuf ga'ee isaa raawwata. Haalli isaa inni Waaqayyo duratti seera isaa hundumaa keessatti, qulqullummaan, hawwii fi murannoodhaan deemuudha; akkasumas kanaaf, karaa isaa akka eeggatu dha. Amantii keenya keessatti dhaabataa ta'uuf, of eeggannoo fi qorannoo caalaa wanti barbaachisu hin jiru.

2. Namoota muraasa ilaalchisee, maal akka isaanitti godhuuf qajeelfama kenneef, akkasumas qajeelummaa namoota muraasaaf dhabe fi gaarummaa namoota kaaniif dhabe akka guutuuf. (1.) Yo'aabii wajjin (Lakk. 5). Daawit amma ofii isaa beeka ture, yeroo inni deebi'ee seera cabse, isa dhiisuun isaa gaarii akka hin turre, garuu ajjeechaa Abneer isa duraa fi Amasaa isa boodaa, isaan lamaanuu namoota gurguddoo, ajajoota loltoota Israa'el turan. Inni gantummaadhaan isaan ajjeese (dhiiga waraanaa nagaatti dhangalaase), akkasumas Daawitiif miidhaa geessise: "Wanta inni anaaf godhe sana ati ni beekta." Ajjeechaan lammii tokkoo mootiif miidhaa dha, isaaf dhabama dha, akkasumas nagaa gooftaa keenya mootichaa irratti dha. Ajjeechaawwan kun addatti Daawit irratti turan, maqaa isaa irratti dhiibbaa geessisan, inni yeroo sana warra ajjeefaman sana wajjin waliigaltee irra waan tureef, akkasumas faayidaa isaa, kan isaan tajaajiluu danda'an, balaadhaaf saaxile. Abbootiin seeraa dhiiga warra isaan itti gaafatamummaa qaban sanaaf haaloo baasan. Yakka Yo'aab kan hammaarse, inni yakka sanaafis ta'e adaba sanaafis hin qaana'in, garuu dhiiga qulqulluu kan xureeffame hidhata fi kophee isaa, qajeelummaa Waaqayyoo fi mootichaa lamaanuu tuffachuudhaan, ija jabinaan uffate. Daawit isa gara ogummaa Solomoonitti qajeelcha (Lakk. 6), akkasumas isa gara qajeelummaa isaa akka dhiise ibsa.

Ibsa guutuu dubbisi Sagalee, ibsa guutuu fi dubbisa toora alaa

Hiikkoowwan8 · 6

AMHEVG ዳዊትም የሚሞትበት ቀን ቀረበ፤ ልጁንም ሰሎሞንን እንዲህ ሲል አዘዘው፦ አማርኛ ENGNIV When the time drew near for David to die, he gave a charge to Solomon his son. English BCV ዳዊት ዝሞተላ መዓልቲ ምስ ቀረበት ንሰሎሞን ወዱ ኸምዙይ ኢሉ ኣዘዞ፦ ትግርኛ GAZBIB Daawit yeroon du'uu isaa yommuu dhi'aate ilma isaa Solomoonin waamee gorsa kanatti fufee jiru in kenneef. Afaan Oromoo BCV GIZ ወበጽሐ መዋዕሊሁ ለዳዊት ለመዊት ወአዘዞ ለሰሎሞን ወልዱ ወይቤሎ፦ giz BCV aksum ዳዊት ዝሞተላ መዓልቲ ምስ ቀረበት ንሰሎሞን ወዱ ኸምዙይ ኢሉ ኣዘዞ፦ ትግርኛ AMHNIV ዳዊት የሚሞትበት ጊዜ እንደ ተቃረበም፣ ልጁን ሰሎሞንን እንዲህ ሲል አዘዘው፤ አማርኛ SWAHSUV Basi siku ya kufa kwake Daudi ikakaribia, akamwusia Sulemani mwanawe, akasema, Kiswahili