1ብኸናፍሩ ኻብ ዝውስልት ሰነፍ፥ ብዘይ ነውሪ ዝመላለስ ድኻ ይሐይሽ።
2ነፍሲ፥ ብዘይ ፍልጠት ክትከውን ሰናይ ኣይኮነን፤ ቅልጡፍ እግሪ ኸዓ መንገዲ ይስሕት።
3ሰብ ብስንፍናኡ መንገዱ የቐይንን፤ ልቡ ኸዓ ኣብ እግዚኣብሄር የንፀርፅር።
4ሃብቲ፥ ብዙሓት ፈተውቲ ይውስኽ፤ ንድኻ ግና ፈታዊኡ እኳ ይርሕቖ።
5ሓሳዊ ምስክር እንተይተቐፅዐ ኣይተርፍን፤ እቲ ሓሰት ዝዛረብ ከዓ ኻብ መቕፃዕቲ ኣየምልጥን።
6ንለጋስ ሰብ ብዙሓት የቀባጥሩሉ፤ ነቲ ውህብቶ ዝህብ ድማ ዅሎም ፈተውቱ ይኾኑ።
7ንድኻ ዅሎም ኣሕዋቱ ይፀልእዎ፤ ፈተውቱ ግዳ ኻብኡ ኽንደይ ዘይርሕቑ! ብቓላት ይስዕቦም፥ ግናኸ ኣይረብሕዎን።
8ጥበብ ዘጥሪ ንነፍሱ የፍቅራ፤ ንምስትውዓል ዝሕልዋ ኸዓ ሰናይ ይረክብ።
9ሓሳዊ ምስክር እንተይተቐፅዐ ኣይተርፍን፤ ሓሰት ዝዛረብ ከዓ ይጠፍእ።
10ንሰነፍ ሕንቃቐ ኣይግብኦን፤ ብሕልፊ እኳ ንባርያ፥ ኣብ ልዕሊ መሳፍንቲ ምስልጣን ኣይግብኦን።
11ምስትውዓል፥ ንሰብ ካብ ኵራ ደንጓዪ ይገብሮ፤ ምሕዳግ በደል ከዓ ኽቡር ይገብሮ።
12ቍጥዓ ንጉስ ከም ምጕዛም ኣንበሳ እዩ፤ ሞገሱ ግና ኣብ ሳዕሪ ኸም ዝወርድ ኣውሊ እዩ።
13ሰነፍ ውሉድ ነቦኡ ሓዘን እዩ፤ ተጓያቚት ሰበይቲ ኸዓ ኸምቲ እንተየቋረፀ ዘንጥብ ናሕሲ እያ።
14ቤትን ሃብትን ካብ ወለዲ ይውረስ፤ ለባም ሰበይቲ ግና ኻብ እግዚኣብሄር እያ።
15ስራሕ ምፍታሕ ድቃስ የምፅእ፤ ነፍሲ ሃካይ ከዓ ትጠሚ።
16ትእዛዝ ዝሕሉ ንነፍሱ ይሕሉ፤ መንገዱ ሸለል ዝብል ከዓ ይመውት።
17እቲ ንድኻ ዝህብ፥ ንእግዚኣብሄር የለቅሕ፤ እግዚኣብሄር ከዓ፥ በቲ ሰናይ ግብሩ ኽፈድዮ እዩ።
18ገና ተስፋ እንተሎ ንወድኻ ቕፅዓዮ፤ ምሟቱውን ኣይትድለ።
19ቍጡዕ ሰብ ቅፅዓቱ ይኸፍል፤ እንተናገፍካዮ ድማ መሊስካ ተግድዶ።
20ምኽሪ ስማዕ፥ ተግሳፅውን ተቐበል፤ ኣብ መወዳእታኻ ኸዓ ጥበበኛ ኽትከውን ኢኻ።
21ኣብ ልቢ ሰብ ብዙሕ ሓሳብ ኣሎ፤ ምኽሪ እግዚኣብሄር ግና ፀኒዑ ይነብር።
22ንሰብ ርህራሄኡ እዩ ገይፁ፤ ካብ ሓሳዊ ሃብታም ሓቀኛ ድኻ ይሐይሽ።
23ንእግዚኣብሄር ምፍራሕ፥ ናብ ህይወት ይመርሕ፤ እቲ ዝፈርሖውን ፀጊቡ ይሓድር፤ ክፉእ ከዓ ኣይረኽቦን።
24ሃካይ ንኢዱ ናብ ፃሕሊ የእትዋ፤ ግናኸ ናብ ኣፉ እኳ ኣይመልሳን።
25እቲ ገርሂ ምእንቲ ኽጥንቀቕ፥ ንመላገፂ ቕፅዓዮ፤ ንመስተውዓሊ እንተ ገሰፅካዮ፥ ፍልጠት ይረክብ።
26እቲ ነቦኡ ዝገፍዕ፥ ንኖኡውን ዝሰጒጕ መሕፈርን ነውራምን ውሉድ እዩ።
27ወደይ፥ ነቲ ኻብ ፍልጠት ዘርሕቐካ ምኽሪ ኣይትስምዓዮ።
28ወስላታ ምስክር ኣብ ፍትሒ የባጩ፤ ኣፍ ሓጥእ ከዓ በደል ይውሕጥ።
29ንመላገፅቲ ፍርዲ፥ ንዝባን ዓያሹ ኸዓ በትሪ ተዳልዩሎም ኣሎ።