1Waaqayyo,“Yaa ijoollee Benyaamiin, badiisi biyya gara bitaatii sababii dhufaa jiruuf, diigamuu guddaanis waan dhi'aateef, Yerusaalemii ba'aatii baqadhaa! Teqo'aatti fiinoo afuufaatii, Bet-Hakereem keessatti milikkita lolaa ol kaasaa!
2Mandara Xiyoon ishee miidhagdhuu fi qananiituu ani nan balleessa.
3Akkuma tiksoonni naannoo tokko buufatanii bushaayee isaanii dheechifatan, akkasuma dura-buutonni diinotaa loltoota isaanii wajjin dhufanii, naannessanii adduma addaan godoo godoo isaanii dhaabbatanii ishee irra in buufatu.
4“Isaan,“Isheetti lola kaasuudhaaf qophaa'aa, ka'aa, guyyaa saafaa ishee in waraannaa! Garuu gaadidduun dheerachaa adeemuutti waan jiruuf, aduunis nutti dhi'uuf waan jedhuuf, nuuf wayyoo!
5Egaa kottaa halkaniin baanee rukunnee ishee in balleessinaa!” in jedhu” jedhe.
6Waaqayyo gooftaan maccaa dura-buutota diinota kanaatiin, “Mandarri Yerusaalem isheen cunqursaan keessa guute kun akka adabamtutti, mukkeetii muraa isheetti naannessaatii koobii ijaarradhaa!
7Akkuma burqaan bishaanii bishaan qabbanaa'aa yaasu, akkasuma isheen hammina ishee of keessaa in yaafti; humnaan nama irratti ka'uunii fi nama cunqursuun, yeroo hundaa ishee keessatti in dhaga'ama; inni isaan nama reebanii madeessan, yeroo hundaa fuula koo dura jira.
8Yaa Yerusaalem! Ani akkan si irraa gara hin galletti, biyya kees balleessee namni akka keessa hin jiraanne akkan hin goonetti, gorsa koo dhaga'i!” in jedhe.
9Ammas Waaqayyo gooftaan maccaa, “Akkuma qarmiin ija waynii funaanamu, akkasuma saba Israa'el keessaa warri hafan raawwatanii in funaanamu; akkuma nama ija waynii damee isaa irraa ciruutti, harka kee gara isaatti hiixadhu!” jedhee anatti in dubbate.
10Yommus ani immoo deebisee, “Eenyutti dubbadhee, eenyuunis gorsu ree” Eenyutu wanta ani jedhu dhaga'a” Kunoo! Isaan mata-jabeeyyii waan ta'aniif, dubbii kee dhaga'uu in didan. Kunoo! Isaan dubbii kee akka ga'ootti waan ilaalaniif, isa dhaga'uutti hin gammadan.
11Kanaaf yaa Waaqayyo, dheekkamsi kee ana keessa in guute; ani isa of keessatti ittisuu hin danda'u” nan jedhe; yommus Waaqayyo deebisee, “Ijoollota karaa irra jiran irratti, wal ga'ii dargaggootaa irrattis dheekkamsa koo dhangalaasi! Abbaan manaa fi haati manaa, warri dulloomanii lafa guuran in booji'amu.
12Ani harka koo warra biyya kana jiraatan irratti waanan ol fudhadhuuf, manneen isaanii, maasiin isaanii fi dubartoonni isaanii saba kan biraatiif in kennamu.
13“Isaan isa guddaadhaa hamma isa xinnaatti, hundumti isaanii bu'aa dalgaa duukaa in bu'u. Raajonnii fi luboonni iyyuu namoota in gowwoomsu;
14cabni saba kootii akka waan salphaatti fayyu, “Nagaa dha!?“Nagaa dha!” in jedhu; nagaan garuu hin jiru.
15Wanta ciiggaasiisaa akkasii waan hojjetaniif, yeella'uun isaan irra ture, isaan garuu hin yeellaane, yeelloon maal akka ta'es hin beekne; kanaaf isaanis warra kufanii wajjin in kufu, ani isaan adabuu yommuun dhufu, isaan kufaatii guddaa in kufu” jedhee anatti dubbateera.
16Ammas Waaqayyo isin saba isaatti dubbatee, “Gara karaatti as ba'aatii ilaalaa! “Daandiin inni durii, karaan inni ba'eessi sun amma eessa jira?” jedhaatii gaafadhaa! Boqonnaa akka argattanitti karicha irra adeemaa!” jedhe; isin garuu,“Lakkii nuyi isa irra adeemuu hin barbaannu” in jettan.
17Waaqayyo immoo,“Ani eegdota isiniif kenneen, “Yommuu isaan fiinoo afuufan dhaga'aa!” isiniin jedhe; isin garuu, “Lakkii nuyi dhaga'uu hin barbaannu” in jettan.
18Kanaaf isin yaa saba lafa irraa dhaga'aa! Isinis warri asitti walitti qabamtan, wanta saba kootti dhufuuf jiru qalbifadhaa!
19Yaa lafaa dhaga'i! Sabni koo sagalee koo waan hin dhaga'iniif, abboommii koos waan tuffataniif, kunoo, ani isaan irratti badiisa nan fida, innis ija hojii isaanii ti.
20Ixaanni biyya Sheebaatii dhufuu fi mukti urgooftuu biyya fagoodhaa dhufu maal anaaf godha” Qalmi keessan inni gubamu ana hin gammachiisu! Aarsaan keessanis anatti hin tolu.
21Kanaaf kunoo! Ani saba kana dura gufuu nan kaa'a, abbaanii fi ilmi isa gufatanii in kufu, olloonnii fi firoonni walumaa wajjin in dhumu” jedhe.
22Waaqayyo,“Kunoo! Sabni tokko biyya gara bitaatii in dhufa, sabni guddaan tokkos biyya fagootii in ka'a.
23Yaa mandara Xiyoon! Isaan gara-jabootaa fi warra oo'a hin qabnee dha, iddaadhaa fi eeboo ol fudhataniiru, sagaleen isaanii akka galaana huursuu ti; isaan si loluudhaaf qophaa'anii fardeen yaabbatanii in dhufu” jedhe.
24Warri Yerusaalem keessa jiraatan immoo, “Nuyi waa'ee kanaa yommuu dhageenye harka keenya in dachaafanne, naasuunis nu qabate, akka dubartii ciniinsifattuus in taane.
25Diinonni keenya billaa hidhatanii karaa hundumaa waan nu sodaachisaniif, nuyi alatti gad ba'uu yookiis karaa irra adeemuu hin dandeenye” jedhan.
26Yaa saba ko, diinni nu balleessuudhaaf dingata waan dhufuuf, uffata gaddaa uffadhuutii daaraa keessa gangaladhu! Akka nama ilma tokkichaaf wawwaatee gadde boo'uuttis boo'i!
27Waaqayyo,“Akka nama sibiila qoruutti ati saba koo qortee akka ilaaltuuf, jireenya isaaniis qortee akka hubattu si godheera.
28Isaan hundumti isaanii akka sibiila borrajjii fi akka sibiila gurraachaa mata-jabeeyyii dha, didduu dhas.
29Dilalii baqsuudhaaf buufaan hamma fedhe yoo itti buufame iyyuu, dilalichumatu boolla buufaa keessaa ba'a malee, udaan sibiilaa keessaa hin ba'u; akkasuma immoo warri jal'oonni saba kana keessaa hin baafamin waan jiraniif, isaan qulleessuudhaaf itti dadhabuun akkasumaan.
30Ani Waaqayyo waanan isaan tuffadheef, isaan “Meetii gatame” in jedhamu” jedhe.