አሐሽዌሮስ

አሐሽዌሮስ (ምናልባትም ቀዳማዊ ጠርክሰስ) በመጽሐፈ አስቴር ውስጥ በተገለጹት ክስተቶች ወቅት የፋርስ ንጉሥ ነበር። ከሕንድ እስከ ኢትዮጵያ ድረስ ባለው ሰፊ ግዛት ላይ ገዝቷል። በንግሡ በሦስተኛው ዓመት አሐሽዌሮስ ታላቅ ግብዣ አደረገ፤ ንግሥቲቱንም አስቲን ወደ እርሱ እንድትመጣ ጠየቀ። እርስዋም ለመምጣት እምቢ ባለች ጊዜ ንጉሡ ከሥልጣን አወረዳት። (አስ.1) አዲስ ንግሥት ፍለጋ ተደረገ፣ አስቴርም የምትባል ወጣት አይሁዳዊት ሴት ተመረጠች። አስቴር የአይሁድ ማንነቷን ደበቀች። (አስ.2) በኋላም ሐማ የተባለ ከፍተኛ ባለሥልጣን የአስቴር ዘመድ የሆነውን መርዶክዮስን በመጥላቱ ምክንያት አይሁዶችን ለማጥፋት አሴረ። ሐማም አይሁዶችን ሙሉ በሙሉ ለማጥፋት የሚያስችል አዋጅ እንዲወጣ አሐሽዌሮስን አሳመነው። (አስ.3) አስቴር የአይሁድ ማንነቷን ለአሐሽዌሮስ ገለጠችለትና የሐማንም ሴራ አጋለጠች። ንጉሡም ሐማ እንዲገደል አዘዘ፤ አይሁዶችም ራሳቸውን እንዲከላከሉ የሚፈቅድ አዲስ አዋጅ አወጣ። (አስ.7-8) አይሁዶችም በጠላቶቻቸው ላይ ድል አደረጉ፣ አሐሽዌሮስም መርዶክዮስን በግዛቱ ውስጥ ወደ ከፍተኛ ቦታ ከፍ አደረገው። (አስ.9-10) አሐሽዌሮስ በዕዝ 4:6ላይም ተጠቅሷል፤ በዚያም ንግሡ የኢየሩሳሌምን ግንባታ ከመቃወም ጋር የተያያዘ ነው፤ እንዲሁም በዳን 9:1ላይ የሜዶናዊው ዳርዮስ አባት ተብሎ ተጠቅሷል። ቀዳማዊ ጠርክሰስ ከ486 እስከ 465 ዓ.ዓ. ገዝቷል።