1ስለዙይ “ባስልኤልን ኤልያብን ኵሎም ጥበብ ዘለዎም ሰባትን መቕደስ ንምስራሕ ዘድሊ ዅሉ ስራሕ ምስራሕ ምእንቲ ኽፈልጡ፥ እግዚኣብሄር ጥበብን ምስትውዓልን ዝሃቦም፥ ከምቲ ዅሉ እግዚኣብሄር ዝኣዘዞ ነገር ክገብሩ እዮም።”
2ሙሴ ድማ ንባስልኤልን ንኤልያብን፥ ንዅሎም እቶም መፂኦም ነዝ ስራሕ እዙይ ክሰርሑ ድሌት ዘለዎምን፥ እግዚኣብሄር ጥበብ ዘሕደረሎም ክኢላታት ሰባትን ፀውዐ።
3ንሳቶም ከዓ ነቲ ደቂ እስራኤል ንስራሕ መቕደስ ኢሎም ዘምፅእዎ ዅሉ ውህብቶ፥ ክሰርሑሉ ኻብ ሙሴ ተቐበሉ። ንሳቶም ድማ፥ ነቲ ብድሌት ዝህብዎ ውህብቶ፥ ንግሆ ንግሆ የምፅእዎ ነበሩ።
4እቶም ንዅሉ ስራሕ መቕደስ ዝሰርሑ ዝነበሩ ዅላቶም ጥበበኛታት፥ ነፍሲ ወከፎም ካብቲ ዝሰርሑዎ ዝነበሩ ስራሖም ናብ ሙሴ መፂኦም፦
5“እዝ ህዝቢ እዙይ፥ ነቲ እግዚኣብሄር ክግበር ዝኣዘዞ ስራሕ ንምስራሕ ካብ እቲ ዘድሊ ሕልፊ የምፅእ ኣሎ” ኢሎም ተዛረብዎ።
6ሽዑ ሙሴ “ሰብኣይ ወይ ሰበይቲ ንመስርሒ መቕደስ ዝኸውን ውህብቶ ኣይተምፅኡ” ኢሉ ኣብ ሰፈር ኣዘዘ እሞ፥ እቶም ህዝቢ ኸየምፅኡ ተኸልከሉ፤
7እቲ ዝተውሃበ ነቲ ዅሉ ዝስራሕ ስራሕ ኣኺሉ ዝተርፍ ነበረሞ።
8እቶም ነቲ ስራሕ ዝሰርሑ ዝነበሩ ዅሎም ጥበበኛታት፥ ነቲ ድንኳን ብዓሰርተ ዓለባታት ሰርሕዎ፤ ብዝተፍሓሰ ሃርን ብሰማያዊ፥ ሓምራዊ፥ ውፁእ ቀይሕ ብዝኾነ ፈትልን ገበርዎ፤ ብብልሓት ዝተጠልፈ ምስሊ ኪሩቤል ከዓ ገበሩሉ።
9እቲ መጋረጃ ንውሓቱ ዕስራን ሾመንተን እመት፥ ወርዱ ኣርባዕተ እመት ነበረ። ኵሉ እቲ ዓለባታት፥ ሓደ ዓይነት ስፍሪ ዘለዎ ነበረ።
10ነቲ ሓሙሽተ ዓለባታት ንስንሳቱ ኣጋጠምዎ፤ ነቲ ዝተረፈ ሓሙሽተ ዓለባታትውን፥ ንሕድሕዱ ኣጋጠምዎ።
11ኣብቲ ቐዳማይ ዝተጋጠመ ኣብ ጠርዚ እቲ ወሰናይ ዓለባ፥ ብሰማያዊ ፈትሊ ቐለበታት ገበሩሉ። ኣብቲ ኻልኣይ ዝተጋጠመ ድማ፥ ኣብ ጠርዚ እቲ ወሰናይ ዓለባ ኸምኡ ገበሩሉ።
12ኣብቲ ሓደ መጋረጃ ሓምሳ ቐለበታት ገበሩ። ኣብቲ ኻልኣይ ዝተጋጠመ ኸዓ፥ ኣብ ጠርዚ እቲ ወሰናይ መጋረጃ ሓምሳ ቐለበታት ገበሩ። እቲ ቐለበታት ድማ፥ ንሕድሕዱ ኸም ዝራኸብ ገበርዎ።
13ሓምሳ ቝልፊ ወርቂ ኸዓ ሰርሑ እሞ፥ ነቲ ዓለባታት በቲ ቝልፍታት ንስንሳቱ ኣጋጠምዎ። እቲ ድንኳን ድማ ሓደ ኾነ።
14ንመደረብታ እቲ ድንኳን ድማ፥ ካብ ፀጕሪ ጤል ዓለባታት ገበሩ። ኵሉ እቲ ዓለባታት ዓሰርተ ሓደ መጋረጃታት ነበረ።
15እቲ ዓለባ ንውሓቱ ሰላሳ እመት፥ ወርዱ ድማ ኣርባዕተ እመት ነበረ፤ እቲ ዓሰርተ ሓደ መጋረጃታት ከዓ ማዕረ ነበረ።
16ነቲ ሓሙሽተ ዓለባ ንበይኑ ኣብ ሓደ፥ ነቲ ሽዱሽተ ዓለባ ኸዓ ንበይኑ ኣብ ሓደ ኣጋጠምዎ።
17ኣብቲ ቐዳማይ ዝተጋጠመ፥ ኣብ ጠርዚ እቲ ወሰናይ ዓለባ፥ ሓምሳ ቐለበታት ገበሩ። ኣብቲ ኻልኣይ ዝተጋጠመ ኸዓ፥ ኣብ ጠርዚ እቲ ወሰናይ ዓለባ፥ ሓምሳ ቐለበታት ገበሩ።
18እቲ መደረብታ ኽጋጠም እሞ ሓደ ክኸውን፥ ሓምሳ ቝልፊ ነሃስ ገበሩ።
19ነቲ መደረብታ ድማ፥ ካብ ዝተቐረፀ ቘራብቲ ማጓሉ መኽደን ገበሩሉ። ኣብ ልዕሊኡ ኸዓ፥ ካብ ቈርበት እንስሳ ባሕሪ፥ ካልእ መኽደን ገበሩሉ።
20ነቲ ድንኳን ከዓ፥ ካብ ዕንፀይቲ ሰራው ደው ዝብል ሉሕ ገበሩሉ።
21እቲ ሉሕ ንውሓቱ ዓሰርተ እመት፥ ስፍሓቱ ሓደ እመትን ፈረቓን ነበረ።
22ነንሕድሕድ ሉሕ መጣምቲ ዝኾኑ ኸክልተ መተሓሓዚ ገበሩሉ። ንዅሉ እቲ ሉሓት ድንኳን ከዓ ኸምኡ ገበሩሉ።
23ብወገን ደቡብ ነቲ ድንኳን ዕስራ ሉሓት ገበሩሉ።
24ኣብ ትሕቲ እቲ ዕስራ ሉሕ ድማ፥ ብብሩር ዝተሰርሐ ኣርብዓ እግሪ ገይሮም፥ ኣብ ትሕቲ እቲ ኽልተ መተሓሓዚ ዘለዎ ሓደ ሉሕ ክልተ እግሪ፥ ኣብ ትሕቲ እቲ ኻልእ ሉሓት ከዓ፥ ንኽልተ ጉጭ ከክልተ እግሪ ገበሩሉ።
25በቲ ኻልኣይ ወገን ሰሜን እቲ ድንኳን ድማ፥ ዕስራ ሉሕ፥ ገበሩ።
26ኣብ ትሕቲ ሓደ ሉሕ ከክልተ እግሪ እናገበሩ፥ ብብሩር ኣርብዓ እግሪ ሰርሑ።
27ብድሕሪኡ ብወገን ምዕራብ ድንኳን፥ ሽዱሽተ ሉሕ ገበሩ።
28ንዅርናዓቱ ኸዓ ኽልተ ሉሕ ገበሩሉ።
29እዙይ ካብ ታሕቲ ጀሚሩ ኽሳዕ ላዕሊ፥ ክሳዕ እቲ ቐዳማይ ቀለበት ድርብ ነበረ። ንኽልቲኡ ኣብቲ ኽልተ ዅርናዕ ከምኡ ገበሩሉ።
30እቲ ሉሓት ሸሞንተ፥ እቲ ብብሩር ዝተገብረ ኣእጋር ከዓ፥ ኣብ ትሕቲ ሓደ ሉሕ ክልተ እግሪ፥ ዓሰርተ ሽዱሽተ እግሪ ነበረ።
31ብዕንፀይቲ ሰራው ድማ ጋድማት ገበሩ፤ ብሓደ ወገን ድንኳን ንዘሎ ሉሓት ሓሙሽተ፥
32ብኻልኣይ ወገን ድንኳን ንዘሎ ሉሓት ከዓ ሓሙሽተ ጋድም፥ ብድሕሪኡ ብወገን ምዕራቡ ንዘሎ ሉሓት ድማ፥ ሓሙሽተ ጋድም ገበሩ።
33ነቲ ማእኸላይ ጋድም ከዓ ብማእኸል እቲ ሉሓት ገይሩ፥ ካብቲ ሓደ ወሰን ናብቲ ሓደ ወሰን ከም ዝሓልፍ ገበርዎ።
34ነቲ ሉሓት ብወርቂ ለበጥዎ፤ ነቲ ጋድማት ዝኣትዎ ቐለበታት ድማ ብወርቂ ገበርዎ፤ ነቲ ጋድማትውን ብወርቂ ለበጥዎ።
35ነቲ መጋረጃ ብሰማያዊ፥ ሓምራዊ፥ ውፁእ ቀይሕ ፈትልን፥ ብዝተፍሓሰ ሃርን ሰርሕዎ። ብብልሓት ዝተጠልፉ ኪሩቤል ድማ ሰኣሉሉ።
36ካብ ዘይነቅዝ ዕንፀይቲ ኣርባዕተ ዓምዲ ገበሩ። ብወርቂ ኸዓ ለበጥዎ፤ መሰቓቐሊኡውን ካብ ወርቂ ነበረ። ኣርባዕተ እግሪ ብሩር ድማ ብፍሲ ገበሩ።
37መጋረጃ ኣፍ ደገ ድንኳን ከዓ ብሰማያዊ፥ ሓምራዊ፥ ብውፁእ ቀይሕ ፈትልን፥ ዝተፍሓሰ ሃርን ገይሮም ጠለፍዎ።
38ነቲ ሓሙሽተ ኣዕምዱ ድማ፥ ምስ መሰቓቐሊኡ ገበርዎ። ነቲ ጕልላቱን ዘንግታቱን ብወርቂ ለበጥዎ። እቲ ሓሙሽተ ኣእጋሩ ኸዓ ነሃስ ነበረ።