1Yaa Nanawwe, inni rukutee si caccabsu sitti in dhufa, masaraa irra eegduu dhaabi, karaas eegsisi! Mudhii kee jabeeffadhu, humna waraanaa kees cimsii qopheeffadhu!
2Warri saamtuun sanyii Yaaqoob saamanii, waynii isaanii yoo duraa balleessan iyyuu, Waaqayyo akkuma isaanii duriitti Israa'eliif ulfina in deebisa.
3Loltoonni diinaa uffata dhiilgee uffatu, gaachanni loltoota isaa warra jajjaboo diimaa dha; sibiilli konkolaattota isaatii, yeroo qopheeffamee ba'u akka arraba ibiddaa in ifa, eeboon isaas in mirmirfama.
4Konkolaattonni ija mataa hin qabneen karaa irra asii fi achi in fiigu, waltajjii karaa irras gara fuula duraa fi dugda duubaatti in kaatu; bifni isaanii guca boba'u in fakkaata, akka bakakkaas asii fi achi in darbatamu.
5Diinni loltoota isaa warra ulfina-qabeeyyii in waama, isaan karaa isaanii irratti in gufatu, gara dallaa mandarattiittis ariitiidhaan in fiigu, da'oonis iddoo iddoo isaatti in qopheeffama;
6karri lagichaa caccabee banamaa in ta'a, manni mootummichaas huursee in jiga;
7mootittiin qullaatti haftee booji'amtee in adeemti; xomboreewwan ishee qoma isaanii rurrukutatanii, akka gugee in guungumu.
8Nanawween akka kuufama bishaanii ti, akkuma bishaan kuufamicha keessaa yaa'ee sokku, namoonni ishee ishee keessaa yaa'anii in sokku. “Dhaabadhu! Dhaabadhu!” yommuu ittiin jedhanis, tokko illee kan deebi'u hin jiru.
9Wanti achi keessa jiru, badhaadhummaan gombisaa ishee keessaas dhuma hin qabuutii, egaa meeticha saamaa, warqichas saamaa!
10Isheen saamamtee onteetti, duwwaatti hafteettis; sodaattee lapheen dha'ateera; jilbis raafameera, dhagni in hollata, fuulli hundinuus in geddarama.
11Iddoon leenconni keessa dhokatan meerree” Lafti isaan ilmoolee isaanii itti sooran, iddoon leenci kormaanii fi leenci dhalaan dhaqaa turan, lafti ilmooleen leencaa bir'aa malee taa'aa turanis meerree”
12Leencichi nyaata ilmoolee isaatiif hamma ga'u ajjeeseera, leenca dhaltuu ishee kan isaatiifis hamma ga'u qabeera; boolla isaa wanta ajjeeseen, iddoo dhokannaa isaas wanta qabeen guuteera.
13Waaqayyo gooftaan maccaa, “Kunoo, ani siin nan morma; konkolaataa kee aaraan nan guba, ilmoolee leencaa kees billaan in fixa; ani wanta ati qabattee nyaattu lafa irraa raawwadhee nan balleessa, sagaleen ergamoota keetiis deebi'ee hin dhaga'amu” jedhee dubbateera.