Biblight keessatti bani

Maatewos 5

GAZGAZAfaan Oromoo48 Keeyyattoota7:42 Dhaggeeffadhu
Dhaggeeffadhu 7:42 · Diraamaawaa Biblight keessatti bani

1Yesus namoota baay'ee sana argee gaaratti ol ba'e; erga inni taa'ees bartoonni isaa gara isaatti walitti qabaman.

2Inni barsiisuma kanaan afaan isaa saaqqate;

3?Karaa hafuuraatti hiyyeessota warri ta'an haa gammadan, mootummaan waaqaa kan isaanii ti.

4Warri garaan isaanii gadde haa gammadan, isaan jajjabina in argatu.

5Warri garraamiin haa gammadan, isaan biyya isa abdachiifame in argatu.

6Warri waan qajeelaa akka midhaanii beela'anii, akka bishaanii dheebotan haa gammadan, isaan geessifachuuf jiru.

7Warri namaaf oo'an haa gammadan, isaan oo'a in argatu.

8Warri yaadni garaa isaanii qullaa'oo haa gammadan, isaan Waaqayyoon in argu;

9Warri nagaa buusan haa gammadan, isaan ijoollee Waaqayyoo in jedhamu.

10Warri qajeelummaadhaaf jedhanii ari'ataman haa gammadan, mootummaan waaqaa kan isaanii ti.

11?Anaaf jedhanii namoonni yommuu isin arrabsan, yommuu isin ari'atan, (sobaan) waan hundumaa yommuu isin irratti dudubbatanis gammadaa!

12Isaan raajota warra isin duraa akkasuma ari'achaa turan; egaa yeroo hundumaa gammadaa ililchaa waaqa irratti gatiin keessan guddaa in ta'a? isaaniin jedhe.

13Yesus itti fufee, ?Isin soogidda lafaa ti, soogiddi garuu miyaa yoo of keessaa dhabe maaliin deebi'ee miyeeffama ree? Gad baafamee gatamee namni irra ejjetee balleessa malee, homaa tokkoofuu waa'ee hin baasu.

14Isin ifa biyya lafaa ti, mandarri tulluu gubbaatti ijaarame dhokachuu hin danda'u.

15Homtinuu ibsaa qabsiisee guuboo jala hin kaa'u, baattuu ibsaa irra kaa'a malee; ibsichis mana keessa kan jiran hundumaaf in ibsa.

16Namoonni hojii keessan isa gaarii arganii, abbaa keessan isa waaqa irraaf ulfina akka kennaniif ifni keessan akkuma kanaatti namoota duratti haa ifu!? jedheen.

17Yesus, ?Seeraa fi barsiisa raajotaa diiguudhaaf waanan dhufe hin se'inaa, ani isaan raawwachuudhaafan dhufe malee, diiguudhaaf hin dhufne.

18Ani dhuguman isinitti hima, hamma waaqnii fi lafti badanitti seericha keessaa fidalli xinnaan tokko yookiis gar tokkoon fidalaa utuu fiixaan hin ba'in hin badu.

19Kanaafis namni abboommota hundumaa irra xinnaatan keessaa tokko diigee, diigamuu isaas namoota barsiisu, mootummaa waaqaa keessatti isa hundumaa irra xinnaatu in jedhama; namni abboommota kana eegee barsiisu garuu mootummaa waaqaa keessatti guddaa in jedhama.

20Ani isinittan hima, qajeelummaan keessan qajeelummaa warra barsiisota seeraatii fi Fariisotaa irra guddaa yoo caaluu dhabaate, mootummaa waaqaatti gonkumaa hin galtan? isaaniin jedhe.

21Yesus itti fufee, ? ?Hin ajjeesin, namni yoo nama ajjeese abboota firdii duratti itti in faradama? jedhamee warra duriitti akka himame dhageessaniittu.

22Ani garuu isinittan hima, eenyu illee obboleessa isaatti yoo dheekkame abboota firdii duratti itti in faradama; obboleessa isaatiin ?Doofaa? yoo jedhe yaa'ii biyya seerratu duratti itti in faradama; obboleessa isaatiin ?Raatuu? yoo jedhe ibidda qililleetti itti in faradama.

23?Kennaa aarsaa dhi'eessuudhaaf iddoo aarsaatti yoo fidde, iddoodhuma sanattis akka obboleessa kee waa yakkitee yaada isaa miite sitti in yaadatama ta'a.

24Kennaa aarsaa kee achuma iddoo aarsaa duratti dhiisiitii dhaqi obboleessa keetti dura araarami; kana booddee deebi'ii kennaa aarsaa kee dhi'eessi!

25?Nama waan ittiin si hadheessu qabuu wajjin gara yaa'iitti utuu adeemtuu dafii isa firoomfadhu; kanaa achi inni si hadheessu sun abbaa firdiitti si kennata, abbaan firdii immoo eegduu mana hidhaatti si kenna, mana hidhaattis in galfamta.

26Egaa gatii si irra jiru hundumaa of irraa hamma badduu baaftutti, matumaa mana hidhaa sana keessaa akka ati hin baane dhuguman sitti hima? jedhe.

27Yesus, ? ?Hin ejjin? jedhamee akka himame dhageessaniittu.

28Ani garuu isinittan hima, namni ija hawwaatiin dubartii ilaale garaa isaatti isheetti ejjeera.

29Iji kee mirgaa cubbuu yoo si hojjechiise, isa of keessaa baasii gati; guutummaan dhagna keetii qililleetti darbatamuu mannaa, bu'aa dhagna keetii keessaa tokko dhabuu siif wayya.

30Harki kee mirgaa cubbuu yoo si hojjechiise, isa of irraa murii gati; guutummaan dhagna keetii qilillee dhaquu mannaa, bu'aa dhagna keetii keessaa tokko dhabuu siif wayya? jedhe.

31Yesus itti fufee, ? ?Namni haadha manaa isaa baasu caaffata ittiin ishee baasu haa kennuuf? jedhamee himameera.

32Ani garuu isinittan hima, yoo isheen ejjite malee namni haadha manaa isaa baasu, akka isheen ejjituu in godha; namni dubartii gad dhiifamte fuudhus in ejja? jedhe.

33Yesus, ? ?Sobaan hin kakatin, waan gooftaadhaaf kakatte immoo fiixaan baasi!? jedhamee abbootatti akka himames immoo dhageessaniittu.

34Ani garuu isinittan hima, raawwattanii hin kakatinaa! Waaqaan hin kakatinaa, innoo teessoo Waaqayyoo ti.

35Lafaanis hin kakatinaa, innoo ejjeta miilla isaa ti; Yerusaalemiinis hin kakatinaa, innoo mandara mooticha guddichaa ti.

36Mataa keetiinis hin kakatin, rifeensa tokko addeessuu yookiis gurraachessuu hin dandeessu.

37Dubbii keessan keessatti eyyeen keessan eyyee haa ta'u, waawuun keessanis waawuu haa ta'u! Kana irraa kan hafe kan isa hamaa ti? jedhe.

38Yesus itti fufee, ? ?Qooda ijaa, iji; qooda ilkaanii ilkaan haa kennamu!? jedhamee akka himame dhageessaniittu.

39Ani garuu isinittan hima, isa hamaadhaan hin morkatinaa! Namni maddii kee isa mirgaa yoo si kabale, isa gara kaaniis itti qabi!

40Namni yaa'ii si irraa qabaatee qomee kee yoo si irraa fudhachuu barbaade, kootii kees dhiisiif.

41Namni tokko akka kiilo metrii tokkoo isa duukaa akka dhaqxuuf yoo si giddisiise, akka kiilo metrii lamaa duukaa dhaqi!

42Isa si kadhatuuf kenni, nama waa si irraa liqeeffachuu barbaaduttis dugda hin gatin!? jedhe.

43Yesus, ? ?Fira kee jaalladhu, diina kees jibbi!? jedhamee akka himame dhageessaniittu.

44Ani garuu isinittan hima, diinota keessan jaalladhaa, warra isin ari'ataniifis kadhadhaa!

45Kana yoo gootan ijoollee abbaa keessanii isa waaqa irraa in taatu; innoo aduu isaa warra hamootaa fi warra gaggaariidhaaf in baasa, bokkaa isaas warra qajeelotaa fi warra jal'ootaaf in roobsa.

46Warra isin jaallatan duwwaa yoo jaallattan gatii maalii argattu ree? Warri sodaa Waaqayyoo hin qabne iyyuu akkanuma in godhu mitii ree?

47Obboloota keessan duwwaa o'iftanii nagaa yoo gaafatan, warra kaan caalaa maalfaa gootu? Warri saba Waaqayyoo hin ta'in iyyuu akkanuma in godhu mitii ree?

48Egaa abbaan keessan inni waaqa irraa mudaa malee akkuma ta'e, isinis warra mudaa hin qabne ta'aa!? jedhe.

Ibsa

5:1,2

Namni kamiyyuu addunyaa kana keessatti yookiin isa dhufu keessatti gammachuu hin argatu, yoo Kiristoos irraa, seerri dubbii Isaa tiin, isa hin barbaanne ta'eef. Inni isaan barsiise: wanti hamaan isaan jibbisisuu qaban maal akka ta'e, akkasumas wanti gaariin isaan barbaachuu fi itti baay'achuu qaban maal akka ta'e.

5:3-12 Fayyisaan keenya asitti amaloota namoota eebbifamoo saddeet kan ayyaana Kiristaanaa gurguddoo nuuf agarsiisan kenna.

1. Warri hafuuraan hiyyeessota ta’an eebbifamoodha. Isaan kun yeroo haalli isaanii gad aanaa ta’u, yaada isaanii gara haala isaaniitti fidu. Of gadi qabuuf, of salphisu. Hanqina isaanii ni arga, yakka isaaniif ni booyu, akkasumas Furee ni dheebotan. Mootummaan ayyaanaa kan isaaniti; mootummaan ulfinaa immoo isaaniif. 2. Warri gaddan eebbifamoodha. Gaddi Waaqayyoof ta’e sun inni qalbii diddiirannaa dhugaa, dammaqina, yaada of gadi qabee fi araara Waaqayyoo Kiristoos Yesuus keessa jiru irratti hirkannaa yeroo hundumaa ta’uun fudhatama argachuudhaaf, akkasumas hammina hafe qulqulleessuudhaaf Hafuura Qulqulluu yeroo hundumaa barbaaduun, asitti kan fedhamu fakkaata. Samiin gammachuu Gooftaa keenyaati; gaara gammachuu, kan daandii keenya gadi lolaa imimmaan irra ta’een dhaqqabnu. Warri akkasitti gaddan Waaqayyo isaaniitiin ni jajjabaafamu. 3. Warri garraamii ta’an eebbifamoodha. Warri garraamii ta’an, warra calluma jedhanii Waaqayyoof bitaman, warra arrabsoo obsuu danda’an, warra callisan yookaan deebii laafaa deebisan, warra obsa isaaniitiin, yeroo wanta biraa ofii isaaniitiif eeguu dadhabanitti, lubbuu ofii isaanii dhuunfatanidha. Warri garraamii kun, addunyaa kana keessattillee eebbifamoodha. Garraamummaan addunyaa kana keessattillee qabeenya, tasgabbii fi nagaa ni guddisa. 4. Warri qajeelummaa dheebotanii fi beela’an eebbifamoodha. Qajeelummaan asitti eebba hafuuraa hundumaaf kan bakka bu’e. Isaan kun qajeelummaa Kiristoosiin nuuf bitaman, amanamummaa Waaqayyootiin mirkanaa’an. Fedhiin keenya eebba hafuuraa argachuudhaaf cimaa ta’uu qaba. Fedhiin ayyaanaaf qabnu hundumtuu ayyaana hin ta’inillee, fedhiin akkasii kun garuu, fedhii Waaqayyo mataan isaa kaaseedha, inni hojii harka isaa hin dhiisu. 5. Warri araara qabeeyyii ta’an eebbifamoodha. Rakkoo keenya obsaan danda’uu qofa osoo hin taane, warra dhiphina keessa jiran gargaaruudhaaf waan dandeenyu hundumaa gochuu qabna. Lubbuu warra kaaniif garaa laafuu qabna, isaanis gargaaruu qabna; warra cubbuu keessa jiran dhiisne jennee, akka muka ibidda keessaa baafamutti isaan oolchuudhaaf barbaaduu qabna. 6. Warri garaa qulqulluu qaban eebbifamoodha; isaan Waaqayyoon ni arguutii. Asitti qulqullinni fi gammachuun guutummaatti ibsamanii walitti qabaman. Garaan amantiidhaan qulqullaa’uu qaba, Waaqayyoofis eegamuu qaba. Yaa Waaqayyo, garaa qulqulluu akkanaa na keessa uumi. Warra qulqulluu malee eenyullee Waaqayyoon arguuf hin danda’u, akkasumas samiinis warra qulqulluu hin taaneef gammachuu hin ta’u. Akkuma Waaqayyo jal’ina isaanii ilaaluu hin dandeenye, isaanis qulqullina Isaatii ilaaluu hin danda’an. 7. Warri nagaa buusan eebbifamoodha. Isaan nagaa jaallatu, nagaa barbaadu, nagaadhaan ni gammadu, akkasumas callisaaf ni dhama’u. Nagaan akka hin diigamne ni eegu, yeroo diigamus deebisanii ni dhaabu. Yoo warri nagaa buusan eebbifamoo ta’an, warri nagaa diigan immoo wayyoo isaaniif! 8. Warri qajeelummaa irraa kan ka’e dararaman eebbifamoodha. Jedhiinsi kun Kiristaanummaadhaaf addadha; innis warra kaan hunda caalaa bal’inaan irratti cimsamee dubbatameera. Haa ta’u malee, dhiphina keenya keessa homaa Waaqayyo biratti fudhatama argachiisu hin jiru; garuu Waaqayyo warri Isaaf jecha, lubbuu isaanii iyyuu, dhaban, dhuma irratti Isaanis hin dhabneef ni qopheessa. Yaa Yesuus Eebbifamaa! Jechoota kee warri ijoo ta’an kan namoota addunyaa kanaa irraa hammam adda! Isaan warra of tuulan eebbifamoo jedhu, warra gammadan, warra dureeyyii, warra humna qaban, fi warra mo’atan ni dinqisiifatu. Araara Gooftaa irraa haa argannu; akka ijoollee Isaa haa fudhatamnu, mootummaa Isaas haa dhaallu. Qananii fi abdiiwwan kanaaniin, haalota gad aanaa yookaan nama gaddisiisan gammachuudhaan fudhachuu dandeenya.

5:13-16 Isin soogidda lafaa ti.

Ibsa guutuu dubbisi Sagalee, ibsa guutuu fi dubbisa toora alaa

Hiikkoowwan8 · 6

AMHEVG ሕዝቡንም አይቶ ወደ ተራራ ወጣ፤ በተቀመጠም ጊዜ ደቀ መዛሙርቱ ወደ እርሱ ቀረቡ፤ አማርኛ ENGNIV Now when he saw the crowds, he went up on a mountainside and sat down. His disciples came to him, English BCV ብዙሕ ህዝቢ ምስ ረአየ፥ ናብ እምባ ደዪቡ ተቐመጠ፤ ደቀ መዛሙርቱ ድማ ናብኡ ቐረቡ። ትግርኛ GAZBIB Yesus namoota baay'ee sana argee gaaratti ol ba'e; erga inni taa'ees bartoonni isaa gara isaatti walitti qabaman. Afaan Oromoo BCV GIZ ሶበ ርእዮ ብዙኃነ አሕዛበ ዐርገ ውስተ ደብር ወነበረ፡ ወቀርቡ ኀቤሁ አርዳኢሁ። giz BCV aksum ብዙሕ ህዝቢ ምስ ረአየ፥ ናብ እምባ ደዪቡ ተቐመጠ፤ ደቀ መዛሙርቱ ድማ ናብኡ ቐረቡ። ትግርኛ AMHNIV ብዙ ሕዝብ እንደ ተሰበሰበ ባየ ጊዜ፣ ወደ ተራራ ወጣና ተቀመጠ፤ ደቀ መዛሙርቱም ወደ እርሱ መጡ። አማርኛ SWAHSUV Naye alipowaona makutano, alipanda mlimani; na alipokwisha kuketi, wanafunzi wake walimjia; Kiswahili