1Waaqayyo wanta kanatti fufee jiru dubbatee,“Dhaqii nama suphee dha'u irraa cuggee tokko bitadhuu maanguddoota sabaa keessaa muraasa, luboota warra angafoota keessaas muraasa waammadhu!
2Karaa “Karra qiraacii” gara dachaa Ben-Hiinomitti gad bu'ii achitti wanta ani sitti dubbadhu saba kanatti himi!
3Isaaniinis,“Isin yaa mootota Yihudaa, warri Yerusaalem keessa jiraattanis, Waaqayyo gooftaan maccaa, Waaqayyo inni kan Israa'el:- Dhaga'aa! Ani kunoo, badiisa isa dhaga'uun isaa gurra namaatti hin tolle iddoo kanatti nan fida.
4Sabni kun ana dhiisanii, iddoo kana xureessaniiru; waaqayyolii biraa warra abboonni isaanii, isaan ofii isaaniitii, mootonni Yihudaas hin beekneef ixaana aarsaniiru; biyyichas dhiiga nama balleessaa hin qabneetiin guutaniiru;
5iddoowwan ol ka'oo lafa itti ilmaan isaanii aarsaa godhanii guban, Ba'aal Waaqayyo tolfamaadhaaf ijaaraniiru; ani wanta akkasii kana akka godhaniif isaan hin abboomne, kunis yaada koo keessa hin turre.
6Kanaafis kunoo! Barri tokko in dhufa, bara sanattis namoonni iddoo kanaan “Dachaa dhumiisaa” jedhu malee,“Toofet” yookiis dachaa “Ben-Hiinom” hin jedhan jedhe” jedhi! Kana Waaqayyotu dubbate.
7“Ani iddoo kanatti wanta warri Yihudaa fi warri Yerusaalem yaadanii qopheeffatan hundumaa nan balleessa; diinonni isaanii warri lubbuu isaanii balleessuu barbaadan billaadhaan akka isaan fixan, reeffa isaaniis allaattii qilleensa keessa balali'uu fi bineensa caakkaatti galu hundumaaf nyaata nan godha.
8Ani mandarattii kana yommuun diigu, warri karaa darban badiisa isheetti dhufe arganii in dinqifatu, ceepha'aas ishee bira in darbu;
9diinonni isaanii warri lubbuu isaanii balleessuu barbaadan mandara isaanii akka marsan, warri mandarattii kana keessa jiraatan immoo rakkina irraa kan ka'e foon ilmaan isaanii fi intaloota isaanii, foon walii isaaniis akka nyaatan nan godha.
10“Ati immoo yommus namoota sii wajjin dhaqan sana duratti cuggicha caccabsi!
11Jaraanis,“Waaqayyo gooftaan maccaa:- Akkuma qodaan suphee kun erga caccabee deebi'ee haareffamuu hin dandeenye, akkasuma ani saba kana mandarattii kanas nan caccabsa; warri dhuman kunis lafa itti awwaalaman waan hin qabneef, Toofetitti in awwaalamu.
12Ani mandarattii kana akka Toofet namoota ishees akka warra Toofet keessa jiraatanii nan godha; (“Toofet” jechuun “Iddoo ibiddaa” jechuu dha).
13Sababii manneetiin warra bantii isaanii irratti macca waaqaatiif ixaanni aarfamee fi waaqayyolii biraatiif dhibaayyun dhibaafatame hundumaatiif manneetiin Yerusaalem keessa jiran, manneetiin mootota Yihudaa, akka Toofet iddoo xuraa'aa in ta'u jedhe” jedhiin!” jedhe; kana Waaqayyotu dubbate.
14Toofet iddoo Waaqayyo raajii akka inni irratti dubbatuuf itti isa erge sanaa Ermiyaas deebi'ee, oobdii mana qulqullummaa keessa dhaabatee jaraan,
15“Waaqayyo gooftaan maccaa, Waaqayyo inni kan Israa'el,“Kunoo! Sababii isaan boquu jabaatanii wanta ani isaanitti dubbadhe dhaga'uu didaniif, wanta hamaa guutummaa mandarattii kanaa fi gandeen naannoo ishee jiran irratti fiduudhaaf dubbadhe hundumaa nan raawwadha” jedha” jedhe.