1Obboloota ko, baay'een keessan barsiisota ta'uutti hin ariifatinaa! Nuyi warri barsiisota taanu warra kaan irra caalaa firdii fudhachuuf akka jirru in beektu.
2Nuyi hundumti keenya baay'ee irraa in kaanna; namni dubbii isaatiin irraa hin kaanne nama fiixaan ba'ee dha. Inni akka nama luugama itti kaa'etti, namummaa isaa guutummaatti qabuu in danda'a.
3Fardi akka nuuf abboomamuuf afaan isaatti luugama yoo keenye, dhagna isaa guutuu luugamichaan qabnee gara jaallannetti in geessina.
4Mee markaba ilaalaa! Markabni hammana utuma guddatuu qilleensa jabaadhaanis utuma oofamuu, batoo xinnoo tokkoon gara inni isa oofuu barbaadetti in geeffama.
5Arrabnis akkasuma bu'aa dhagnaa xinnoo tokkoo dha; waan gurguddaa baay'eedhaan of in jaja. Ibiddi hammam xinnaatu illee caakkaa hammam guddatu iyyuu in guba.
6Arrabni ibidda; lafas jal'ina hundumaan in guuta. Arrabni bu'aa dhagna keenyaa keessatti iddoo dhaabataa qaba, guutummaa dhagnaas in xureessa; ofii isaatii qilillee ibiddaatiin qabsiifamee, naannoftuu dhalootaa hundumaatti ibidda in qabsiisa.
7Namni uumama isaatiin bineensota keessaa, simbirroota keessaa, bineensota lafa irra munyuuqan keessaa, bineensota bishaan keessa jiraatan keessaa leejjisuu in danda'a, leejjiseeras.
8Garuu namni arraba leejjisuu danda'u hin jiru; inni hamaa gabii hin qabnee dha, hadhaa du'a fiduunis guutuu dha.
9Arabbaan maqaa Waaqayyoo gooftaa in eebbifna, isumaanis namoota fakkaattii Waaqayyootti uumaman in abaarra.
10Afaanuma tokko keessaa eebbii fi abaarsi in ba'a; kun akkas ta'uun irra hin jiru, obboloota ko.
11Burqaan tokko bishaan miyaa'aadhaa fi hadhaa'aa in yaasaa ree?
12Obboloota ko! Mukti harbuu ija ejersaa, mukti wayniis ija harbuu godhachuu danda'aa ree? Akkasuma immoo burqaan horaa bishaan namni dhugu yaasuu hin danda'u.
13Isin keessaa namni ogeessi hubataanis jiraa? Inni karaa garraamummaa ogummaa keessaa argamu sanaa, adeemii isaa isa gaariidhaan hojii isaa isa gaarii haa mul'isu.
14Garaa keessan keessatti hinaaffaa hadhaa'aa, ofittummaas yoo qabaattan garuu, akka ogummaatti ittiin of hin jajinaa! Dhugaa irrattis soba hin dubbatinaa!
15Ogummaan akkasii kun isa lafa irraa ti, kan yaada foonii ti, kan hafuura hamaa ti malee, waaqa irraa isa gad bu'e miti.
16Lafa hinaaffaanii fi ofittummaan jiru, hammacamni, wanti hamaan hundinuus jira.
17Ogummaan waaqa irraa garuu, hundumaa dura qullaa'aa dha, akkasumas naga-qabeessa, garraamii dha, of kennaa dha; oo'aan, ija gaariidhaanis guutuu dha; garaa hir'uun, of arguu dhabuunis keessa hin jiru.
18Karaa isaa warra nagaa buusaniif, sanyiin ija qajeelummaa kennu nagaadhaan in facaafama.