1Ani Phaawulos ofiin koo garraamummaadhaa fi garalaafummaa Kristosiin cimsee isin nan gorsa; ani yommuun isin bira jiru ?Ija-laafessa?, yommuun isin irraa fagaadhu immoo ?Ija-jabeessa? jedhameera.
2Yommuun isin biratti argamu ija-jabinaan akka ana hin dubbachiifne isinan kadhadha; warra akka yaada fooniitti deddeebi'u nuun jedhan irratti, ani ija-jabinaan dubbachuudhaaf yaada koo keessaa akkan qabu of nan amana.
3Nama foonii yoo taane iyyuu, akka yaada fooniitti nama lolla miti.
4Mi'i waraanaa keenya mi'a da'oo jajjabaa jigsuudhaaf Waaqayyoof hojjechuu danda'uu dha malee, mi'a namni foonii ittiin hojjetu miti; yaada amansiisa hin qabne isa nama wallaalchisuuf qophaa'es in diiga.
5Waanuma ogummaa Waaqayyoo gufachiisuudhaaf dura dhaabatu hundumaa diignee, yaada namootaa Kristosiif abboomsisuudhaaf in boojina.
6Erga isin raawwattanii abboomamtanii, nuyis immoo abboomamuu diduu hundumaa adabuudhaaf qophoofnee jirra.
7Wanta ija keessan duratti mul'atu ilaalaa! ?Ani kan Kristos? jedhee namni of amanatu yoo jiraate, inni kan Kristos akkuma ta'e, nus immoo kan Kristos ta'uu keenya itti haa yaadu!
8Aboo gooftaan ittiin isin diiguuf utuu hin ta'in, ittiin ijaaruuf nuuf kenneen utuun caalaatti of jajee iyyuu, ana hin yeellaasisu ture.
9Anis nama, caaffata isaatiin isin sodaachisuu barbaade hin fakkaadhun ture.
10Jarri tokko waa'ee kootiif, ?Caaffata isaa keessatti dubbii dhimma baasuu fi jajjabaa in caafa; yommuu nu biratti argamee afaaniin dubbatu immoo dadhabaa dha, dubbiin isaas dhimma hin kutu? jedhaniiru.
11Nuyi waan isaan irraa fagaannee caaffata keenyaan isaanitti dubbannu, yommuu isaan biratti argamnus isuma hojii irra oolchuuf akka jirru jarri kun haa beekan.
12Nuyi warra ofiif dubbatan sanatti of lakkaa'uudhaaf yookiis isaanitti of qixxeessuudhaaf ija hin jabaannu; isaan ija ofii isaaniitiin wal safaru, walii isaaniittis of in qixxeessu, kunis gowwummaa isaanii ti.
13Nuyi garuu safara malee of hin jajnu; of jajuun keenya isa Waaqayyo hojiidhaaf safaree nuuf laannaan, nuyis immoo ittiin isin bira geenye keessaa hin ba'u.
14Nuyi akka waan kanaan dura isin bira hin ga'in jirrutti isinitti hin hiixannu; nuyi duraan dursinee wangeela Kristos fidne gara keessan dhufneerra.
15Hojii namoonni biraa itti dadhabaniin safara malee of hin jajannu; yeroo amantiin keessan guddatu immoo, nuyis akka hojii Waaqayyo safaree nuuf kennetti, isin biratti nama guddaa akka taanu in abdanna.
16Ammas nuyi isa namni kan biraa lafa hojii isaatiitti hojjetee qopheesseen utuu of hin jajin, isin garasitti iyyuu darbinee wangeela in lallabna.
17Akkuma caafamee jiru iyyuu, ?Namni of jaju, gochaa gooftaatiin of haa jaju!?
18Nama gooftaan dubbatuuftu fudhatamaa ta'uu danda'a malee, namni ofiif dubbatu fudhatamaa ta'uu hin danda'u.