1Ammas hammina hundumaa, haxxumaa hundumaa, of arguu dhabuu, weennoo, maqaa namaa balleessuu hundumaas of irraa fageessaa!
2Akka mucooliin reefuu dhalatan aannan barbaadanitti, isinis fayyinaaf ittiin guddachuudhaaf yeroo hundumaa dubbii hafuuraa isa haxxummaan keessa hin jirre akka aannanii sana dharra'aa!
3Isin gaarummaa gooftaa miyeeffattaniittu yoo ta'e, kana in gootu.
4Gooftichi inni isin gara isaa dhuftan kun akka dhagaa jiraataa ti; namoonni dhagaa sana in tuffatan; inni garuu Waaqayyo biratti fo'amaa dha gati-qabeessas.
5Isinis luboota qulqullummaa ta'uudhaaf; aarsaa hafuuraa isa karaa Yesus Kristos Waaqayyo duratti fudhatamu dhi'eessuudhaaf, akka dhagoota jiraatootti ijaarsa mana isa hafuuraa sanaaf ta'aa!
6Caaffata qulqullaa'aa keessa, ?Kunoo dhagaa mataa golee qajeelchu, isa fo'amaa, isa gati-qabeessas Xiyoon keessa nan kaa'a; inni isatti amanatu immoo hin yeella'u? kan jedhu jira.
7Isin warra itti amantaniif dhagaan kun gatii guddaa qaba; warra itti hin amanneef garuu, caaffanni qulqullaa'aan akkuma jedhutti, ?Dhagichi, mana ijaartuun tuffatan, inni dhagaa mataa golee qajeelchu ta'e?.
8Akkasuma immoo, ?Inni dhagaa nama gufachiisu, kattaa nama kuffisus ta'e? in jedha; isaan sababii dubbichaaf abboomamuu didaniif in gufatu, kunis isaan irratti yaadamee ture.
9Isin garuu qomoo fo'amaa dha, luboota mana mootummaa ti, saba qulqullaa'aa dha, warra dhuunfaa Waaqayyoo ta'anii dha. Waaqayyo hojii isaa isa jajamaa akka labsitaniif dukkana keessaa, gara ifa isaa isa dinqisiisaatti isin waame.
10Isin takka saba Waaqayyoo hin turre, amma garuu saba isaa taataniittu; isin araara Waaqayyoo hin argatin turtan, amma garuu araara isaa argattaniittu.
11Michoota ko! Isin warra ormummaatti jiraattan, warra biyyaa baafamtanis nan gorsa; fedha foonii isa lubbuu keessan lolu irraa fagaadhaa!
12Akki isin warra saba Waaqayyoo hin ta'in keessa itti jiraattan gaarii haa ta'u! Akka waan isin hamaa hojjettaniitti warri maqaa keessan balleessan kun, hojii keessan isa gaarii arganii, guyyaa itti Waaqayyo namoota isaa ilaaluu dhufutti, isaaf ulfina haa kennan!
13Gooftaadhaaf jedhaatii harka warra aboon kennameefii jala of galchaa, mootii isa hundumaa irratti aboo qabuuf abboomamaa!
14Warra abboota biyyaa ta'anii namoota waan jal'aa hojjetan adabuuf, namoota waan qajeelaa hojjetan immoo galateeffachuuf isa biraa ergamaniifis abboomamaa!
15Waaqayyo waan qajeelaa hojjechuu keessaniin namoota warra qalbii malee wallaalummaadhaan dubbatan akka isin afaan qabachiiftan in barbaada.
16Akka warra birmaduu Waaqayyoof garboota ta'aniitti jiraadhaa! Garuu birmadummaan keessan kan ittiin hamaa hojjettanii dhoksitan hin ta'in.
17Namoota hundumaaf ulfina kennaa; obbolummaa amantootaa jaalladhaa; Waaqayyoon sodaadhaa; mootiidhaaf ulfina kennaa!
18Isin warri garbummaa jala jirtan, gooftota keessaniif ulfina kennuudhaan ajaja isaanii jala bulaa! Kanas warra babba'eeyyii fi garraamotaaf duwwaa utuu hin ta'in, warra gaggadheefis immoo akkasuma godhaa!
19Namni Waaqayyoon yaadachaa miidhama sababii malee isa irra ga'u yoo baate, ayyaana in argata.
20Balleessaa keessaniif isa rukutamtan yommuu obsitan, galata maalii qabdu? Garuu gaarii gochuu keessaniif isa dhiphattan yommuu obsitan, Waaqayyo biraa ayyaana in argattu.
21Isin kana gochuudhaaf waamamtaniittu; Kristos immoo isiniif dhiphatee, faana isaa duukaa akka buutaniif fakkeenya isiniif kenneera.
22Caaffata qulqullaa'aa keessa, ?Inni cubbuu hin hojjenne, dubbii isaa keessatti haxxummaan hin argamne? kan jedhu jira.
23Inni yommuu arrabsame deebisee hin arrabsine; yommuu dhiphates Waaqayyo isa firdii qajeelaa faradutti kennate malee, warra isa dhiphisan hin doorsifne.
24Nuyi cubbuu jalaa duunee qajeelinaaf akka jiraannuuf, inni ofii isaatii cubbuu keenya dhagna isaatiin baatee fannootti ol ba'e; madaa'uu isaatiin isin in fayyifamtan.
25Isin akka hoolotaa karaa irraa baddanii turtan, amma garuu gara tiksee fi ilaaltuu lubbuu keessaniitti deebitaniittu.