Roomaa 14

GAZBIBAfaan Oromoo23 Keeyyattoota4:28 Dhaggeeffadhu

Dhaggeeffadhu 4:28 · Idilee · Diraamaawaa Biblight keessatti bani

1Nama dubbii amantiitti dadhabaa ta'e ofitti qabaa! Isa ofitti qabuun keessan garuu yaada inni fudhateen morkachuudhaaf hin ta'in.

2Namni waa gargar baasee hubate waan hundumaa nyaachuu akka danda'u in amana; inni gargar baasee hubachuu dadhabe garuu, nyaata biqiltuu garaa garaa in nyaata.

3Inni nyaata hundumaa sooratu, isa nyaata hundumaa hin sooranne sana hin ceepha'in; inni nyaata hundumaa hin soorannes isa sooratutti hin faradin! Waaqayyo isas ofitti qabeera.

4Ati inni hojjetaa biraatti faraddu, eenyu ati? Inni yoo dhaabates, yoo kufes gooftaa isaatu beeka; haa ta'u iyyuu malee, gooftichi isa dhaabachiisuu waan danda'uuf inni in dhaabata.

5Namni guyyaa tokko guyyoota warra kaan irra caalchifatu jira; inni kaan immoo guyyoota hundumaa wal qixxeetti ilaala. Kana irratti namni adduma addaan akkuma fudhatetti yaada isaa gar tokkotti haa kutatu!

6Namni guyyicha yaadatu gooftaadhaaf isa yaadata; inni nyaata hundumaa sooratu Waaqayyoon waan galateeffatuuf, gooftaa isaatiif hojjechuudhaaf in soorata. Inni nyaata hundumaa hin soorannes gooftaa isaatiif hojjechuudhaaf soorachuu dhiisa, Waaqayyoon immoo in galateeffata.

7Nu keessaa tokko illee akeeka ofii isaatiif hin jiraatu; tokko illees akeeka ofii isaatiif hin du'u.

8Yoo jiraanne, akeeka gooftichaatiin jiraanna, yoo duunes akeeka gooftichaatiin duuna; egaa jiraannus duunus nuyi kan gooftichaa ti.

9Gooftaa warra du'aniif warra jiranii ta'uudhaaf, Kristos du'ee deebi'ee jiraate.

10Ati garuu maaliif obboleessa keetti faradda ree? Yookiis ati maaliif obboleessa kee ceephaata ree? Hundumti keenya barcuma firdii Waaqayyoo duratti dhi'aachuuf jirra.

11Caaffata qulqullaa'aa keessatti, ? ?Dhugaa ana isa jiraataa! Jilbi hundinuu anaaf jilbeenfachuuf, arrabni hundinuus ani Waaqayyo akkan ta'e beeksisuuf jiru? jedha gooftichi? kan jedhu caafameera.

12Kanaafis nu keessaa hundumtinuu adda addaan waan godhe sababii isaa wajjin Waaqayyotti himuuf jira.

13Egaa kottaa walitti hin farannu, isin gufuu dura keessanii obboleessa keessan karaa Waaqayyo irraa akka hin gufachiifneef murtoo godhaa malee.

14Ani karaa gooftaa Yesus wanti tokko illee ofii isaatii xuraa'aa akka hin ta'in beekeera, fudhadheeras; namni tokko wanti kun xuraa'aa dha jedhee yoo amane garuu, isaaf xuraa'aa in ta'a.

15Nyaanni ati nyaattu yaada obboleessa keetii yoo miidhe, ati jaalalatti qabamtee jiraatta miti; nyaata ofii keetiif nyaattuun nama Kristos du'eef, gara badiisaatti hin geessin.

16Kanaanis wanta gaarii Waaqayyo biraa argattan hin arrabsiisinaa!

17Mootummaan Waaqayyoo, mootummaa qajeelummaa, nagaa fi gammachuu warra hafuura qulqulluu biraa kennamanii ti malee, mootummaa nyaataa fi dhugaatii miti.

18Namni isaan kanatti qabamee Kristosiif hojjetu, Waaqayyoon in gammachiisa, namoota birattis in fudhatama.

19Kanaafis kottaa wanta nagaaf ta'u, waan ittiin jireenya tokkummaa waliif ijaarru duukaa in buunaa!

20Nyaataaf jettee hojii Waaqayyoo hin diigin; wanti nyaatamu hundinuu qullaa'aa dha; namicha nyaata isaatiin nama gufachiisuuf garuu gadhee dha.

21Egaa foon nyaachuu, daadhii waynii dhuguu yookiis waanuma obboleessi kee ittiin gufatu dhiisuun gaarii dha.

22Waan qajeelaa dha jettee amantee fudhatte immoo, ofii kee fi Waaqayyo gidduutti qabaadhu! Namni wanta hubatee fudhate sanatti deebi'ee ofitti hin faranne gammachuu qaba.

23Namni mamaa waa nyaatu garuu, amantiidhaan waan inni hin fudhatiniif itti in faradama; wanti amantiidhaan hin hojjetamne hundinuu cubbuu dha.

Ibsa

14:1-6

Addaa addummaan yaadaa akkuma duuka buutota Kiristoos warra Kiristoositti dhihoo turan gidduutti fi barattoota isaanii gidduuttillee bal’inaan argamaa ture. Phaawuloos Qulqulluunis isaan dhaabuu hin yaalle. Barumsa kamiyyuu dirqamaan fudhachuun yookiin amansiifamuu malee seera alaa mul’atuuf tole jechuun fakkeessummaa dha; akkasumas bu’aa tokkollee hin qabu. Kristaanooota gidduutti tokkummaa yaadaa guutuu argamsiisuuf yaaluun bu’aa hin qabu. Tokkummaan Kiristaanummaa jeedalloo jechootaan hin jeeqamin. Yeroo obboleewwan keenya tuffachuufi ceepha’uuf qoramnu, of gaafachuun nuuf gaarii ta’a: Waaqayyo isaan hin fudhanneemoo? Yoo inni fudhateera ta’e, ani immoo isaan didee gatuuf nan jaamoomoo? Kiristaanni bilisummaa isaa fayyadamu, obboleessa isaa dadhabaa akka wallaalaa fi sodaattuutti hin tuffatin. Amantichaa inni of eeggataa ta’e obboleessa isaa irratti hin ceepha’in, sababiin isaa Waaqayyo addaa addummaa nyaataaf ilaalcha tokko illee utuu hin kennin isaan fudhateera.

Yeroo yaadaa fi akeeka warra kaanii, kanneen nutti hin mul’anne, akkaataa kanaan firdii kennuuf of irratti fudhannu, bakka Waaqayyoo ni fudhanna. Dhimmi ayyaanota eeguu ilaalchiseeyyuu akkasuma ture. Warri wantoonni kun hundinuu dhufaatii Kiristoosiin akka dhabaman beekan, ayyaanota Yihudootaa hin ilaalle. Garuu, qalbii keenya waan goonuuf yoo tole jedhe qofti ga’aa miti; Dubbii Waaqayyoo irraa akka mirkanaa’u barbaachisaa dha. Qalbii shakkuu waliin wal morminee hojjechuu irraa of eeggadhaa. Nutis hundi keenya yaada keenya akka safartuu dhugaatti fudhachuuf, akkasumas wantoota namoota kaaniif shakkisiisoo fakkaatanis akka mirkanaa’ootti ilaaluuf hawwii qabna. Kanaafuu, Kiristaanonni yeroo baay’ee dhimmoota shakkisiisoo bu’aa hin qabne irratti wal tuffatu yookiin wal ceepha’u. Ilaalchi galateeffannaa Waaqayyoof qabnu, Inni Hundee fi Kennaa garaa laafummaa keenyaa hundaa ta’e, isaan qulqulleessaafi isaan mi’eessa.

14:7-13

Tokko tokko dadhaboo yoo ta’anis, kaan immoo jajjaboo ta’anis, hundi isaanii garuu ofii isaaniif jiraachuu dhiisuuf walii galuu qabu. Namni maqaa isaa Kiristoosii kenne kamiyyuu, fedhii mataa isaa barbaadaa ta’uu hin qabu; kun Kiristiyaanummaa dhugaa faallessa. Galmi jireenya keenyaa of gammachiisuu miti, Waaqayyoon gammachiisuu dha malee. Kiristiyaanummaan dhugaan, isa Kiristoosiin hundumaa keessatti hundumaa godhu dha. Kiristiyaanonni humna, dandeettii fi hojii xixiqqaa adda addaa yoo qabaatanis, hundi isaanii garuu kan Gooftaa ti; hundi isaanii Gooftaatti ilaaluudhaan, isa tajaajiluudhaan, ofiisaanii Kiristoosiif fudhatamoo taasisu. Inni warra jiraataniif Gooftaadha, isaan bulchuuf; warra du’aniif immoo du’aa kaasuuf Gooftaadha.

Ibsa guutuu dubbisi Sagalee, ibsa guutuu fi dubbisa toora alaa

Hiikkoowwan8 · 6

AMHEVG በእምነት የደከመውንም ተቀበሉት፥ በአሳቡም ላይ አትፍረዱ። አማርኛ ENGNIV Accept him whose faith is weak, without passing judgment on disputable matters. English BCV ነቲ ብእምነቱ ዘይጠንከረ ሰብ ተቐበልዎ፤ ኣብ ሓሳቡውን ኣይትፍረዱ። ትግርኛ BCV GIZ ወለዘኒ ድኩም ሃይማኖቱ ጹርዎ ወአጽንዕዎ ወኢትግበሩ ለአድልዎ። giz GAZGAZ Nama dubbii amantiitti dadhabaa ta'e ofitti qabaa! Isa ofitti qabuun keessan garuu yaada inni fudhateen morkachuudhaaf … Afaan Oromoo BCV aksum ነቲ ብእምነቱ ዘይጠንከረ ሰብ ተቐበልዎ፤ ኣብ ሓሳቡውን ኣይትፍረዱ። ትግርኛ AMHNIV በእምነቱ ደካማ የሆነውን ሰው፣ አከራካሪ በሆኑ ጒዳዮች ላይ በአቋሙ ሳትፈርዱበት ተቀበሉት። አማርኛ SWAHSUV Yeye aliye dhaifu wa imani, mkaribisheni, walakini msimhukumu mawazo yake. Kiswahili