1Daadhiin waynii ga'iftuu nama godha, dhugaatii jabaanis nama in wacisiisa; namni isaaniin machaa'ee gatantarus ogeessa miti.
2Dheekkamsi mootii inni naasisaan akka aadnaa leencaa ti, namni isa dheekkamsiisus ofiidhuma isaa irratti muka muruu isaa ti;
3qoccolloo irraa fagaachuun namaaf ulfina, wal loluutti ariifachuun garuu gowwummaa dha.
4Namni dhibaa'aan yeroo dhaamochaa waan hin qonneef, makariitti midhaan kadhata, garuu homaa hin argatu.
5Akeeki garaa namaa akka bishaan gad fagoo ti, nama hubataa duwwaatu isa keessaa waraabbata.
6Namoonni baay'een, “Nuyi amanamoo dha” ofiin jedhu, garuu nama amanamaa eenyutu argachuu danda'a”
7Namni qajeelaan jireenya mudaa hin qabne jiraata, isa booddees ijoolleen isaa in gammadu.
8Mootiin barcuma firdii irra yommuu taa'u, ijuma isaatiin wanta hamaa hundumaa of duraa in bittimsa.
9Eenyutu,“Ani yaada garaa koo qulleeffadheera, cubbuu koo irraas qullaa'eera” jechuu danda'a ree?
10Miijanni jal'aanii fi safartuu jal'aan, Waaqayyo biratti jibbamoo dha;
11mucaan iyyuu qullaa'aa fi qajeelaa ta'uun isaa, hojii isaatiin in beekama.
12Gurra dhaga'uu fi ija argu, lachuu isaa Waaqayyotu uume.
13Akka hin hiyyoomnetti hirriba hin jaallatin! Midhaan akka quuftutti dammaqii hojjedhu!
14Namni yommuu waa bituuf jedhu, “Gatiin isaa mi'aa dha” jedha, erga bitatee booddee garuu, “Ba'eessan bitadhe” jedhee of in jaja.
15Warqeenii fi elellaan diimaan baay'inatti jiru, afaan dubbii beekumsaa dubbatu garuu, akka dhagaa gati-jabeessa isa baay'inatti hin argamnee ti.
16Wayyaa nama isa ormaaf wabii darbuu qabsiisa fudhadhu! Qooda namicha hin beekamne sanaa wayyaa isaa qabsiisa godhii fudhadhu!
17Buddeenni gowwoomsaadhaan argame namatti in miyaa'a; booddee garuu cirrachatu afaan nama guuta.
18Wanti yaadame, mareedhaan jabaatee in dhaabata; lola yoo dhaqxe ogummaadhaan geggeessi!
19Namni asii fi achi labee nama hamatu dhoksaa in mul'isa, nama dubbii baay'isuttii fagaadhu!
20Namni abbaa isaa fi haadha isaa yoo abaare, ibsaan isaa dukkana limixii keessatti in dhaama.
21Qabeenyi dhaalaan dhufu jalqabatti dafee argamuu in danda'a; dhumni isaa garuu eebba hin qabu.
22Namni si irratti hamaa yoo hojjete, “Deebiseen hamaa irratti hojjedha” hin jedhin! Waaqayyoon eeggadhu, inni immoo si oolcha.
23Waaqayyo miijana jal'aa in jibba, madaaliin hin amanamnes isatti hin tolu.
24Ejjennaa namaa kan qajeelchu Waaqayyoo dha, namni karaa isaa gargar baasee hubachuu danda'aa ree”
25Namni utuu itti hin yaadin Waaqayyoof wareega wareegee, booddee immoo deebi'ee yoo seese kiyyoo lixuu isaa ti.
26Mootiin ogeessi warra jal'oota in bittimsa, konkolaataa ittiin midhaan cagadan isaan irra in gangalcha.
27Ibsaan Waaqayyoo yaada namaa keessatti in ifa, keessa namummaa namaas qoree in ilaala.
28Gaarummaanii fi amanamummaan nagaadhaan mootii in eegu, teessoon isaas qajeelummaadhaan in jabaata.
29Surraan dargaggootaa jabina isaanii ti, ulfinni maanguddootaa garuu harrii isaanii ti;
30kabalee madeessuun wanta hamaa irraa qulleessuuf, rukutuunis keessa namummaa namaa qulleessuuf.